Երեկ «Յոթի գործով» մեղադրվող Գրիգոր Ոսկերչյանի պաշտպան Ստեփան Ոսկանյանը հայտարարել էր, թե իր պաշտպանյալին մեկուսարանում ծեծել են, ինչը քրեակատարողական վարչության պետի մամուլի քարտուղար Արսեն Բաբայանը որակել էր իբրեւ հերյուրանք: Այսօր «Ուրբաթ» ակումբում հրավիրված ասուլիսի ընթացքում «Յոթի գործի» պաշտպաններն անդրադարձան նաեւ այդ խնդրին: «Ձեր կարծիքով պե՞տք է ասեին` ծեծել ենք, լավ ենք արել»,- նկատեց փաստաբան Լիպարիտ Սիմոնյանը: Իսկ Ոսկերչյանի պաշտպան Ստեփան Ոսկանյանը նշեց, թե այսօր «Նուբարաշեն» քրեակատարողական հիմնարկում (ՔԿՀ) տեսակցել է իր պաշտպանյալին, եւ «այլ կարծիք լինել չի կարող. Ոսկերչյանի նկատմամբ իրականացվել են բռնարարքներ եւ խոշտանգումներ»: Ավելին` պաշտպանի տեղեկություններով` բռնարարքներ են եղել ոչ միայն Գրիգոր Ոսկերչյանի, այլեւ վերջինիս խցակիցների եւ մեկուսարանի մյուս կալանավորների նկատմամբ, «որոնցից մի քանիսի վիճակը ծայրաստիճան վատ է, նույնիսկ լսել եմ, որ տեղափոխվել են հիվանդանոց»: Ստեփան Ոսկանյանը կատարվածի վերաբերյալ հաղորդում է ներկայացրել գլխավոր դատախազին եւ միջնրդել է մեղավորների նկատմամբ հարուցել քրեական գործ: «Միաժամանակ նաեւ ներկայացվել է իմ պաշտպանյալի նկատմամբ դատաբժշկական փորձաքննություն նշանակելու մասին որոշում կայացնել, քանի որ երեկ դատական նիստի ժամանակ նաեւ նկատեցինք, որ Ոսկերչյանի ականջի շրջանում կարմրության հետքեր կան եւ նա գանգատվում էր ականջի ուժեղ ցավերից»,- ասում է փաստաբան Ոսկանյանը: «Ոսկերչյանին ծեծի ենթարկող անձը, ըստ իր հայտարարության, եղել է քրեական պատիժների իրականացման վարչության հատուկ ջոկատի ղեկավարը: Այդ անձնավրությանն իմ պաշտպանյալը դեմքով կճանաչի, եթե կատարվեն համապատասխան քննչական գործողություններ»,- ավելացնում է փաստաբանը: Նա նշում է նաեւ, թե երեկ երեկոյան իրեն հայտնել են, որ Ոսկերչյանին անհայտ պատճառներով խցից տղափոխել են: «Ես կապվել եմ ՔԿՀ-ի վարչության մամլո խոսնակի հետ եւ նա պաշտոնապես հայտարարեց, որ նման բան չկա: Բայց այսօր տեսակցության ժամանակ պարզվեց, որ երեկ երեկոյան նրան 006 խցից տղափոխել են 43 խուց, որտեղ պայմաններն անհամեմատ ավելի վատն են: Եթե նախկինում նա գտնվում էր 4 կալանավորների հետ, այժմ նա տարածքով ավելի փոքր խցում 11 անձանց հետ է, եւ իր համար չկան աշխատելու պայմաններ, մասնավորապես քրեական գործի նյութերն ուսումնասիրելու եւ գրառումներ կատարելու»,- մանրամասնում է Ս. Ոսկանյանը: Վերջինս գլխավոր դատախազին ներկայացրած իր հաղորդման մեջ նշել է նաեւ «Յոթի գործը» քննող դատավոր Մնացական Մարտիրոսյանի կողմից հանցագործություն կատարելու մասին, քանի որ «դատարանի դահլիճում նրա ներկայությամբ հնչած խոշտանգման մասին հայտարարությանը նա որեւէ կերպ չի արձագանքել»: