Այսօր «Ուրբաթ» ակումբում հրավիրված ասուլիսի ժամանակ «Յոթի գործով» պաշտպաններից Մելանյա Առուստամյանը նշեց, որ «այս դատաքննությամբ մեր երկիրն ավելի ու ավելի է տարվում փակուղի»: «Ես մարտի 2-ից պաշտպանում են Մյասնիկ Մալխասյանին, մարտի 5-ից` Հակոբ Հակոբյանին: Այս ամբողջ պրոցեսի ընթացքում համոզվել եմ, որ մարտի 4-ին, երբ գլխավոր դատախազը ԱԺ-ում հայտարարեց, թե առկա են հիմնավոր ապացույցներ` պատգամավորների նկատմամբ մեղադրանք առաջադրելու եւ նրանց նկատմամբ խափանման միջոց կալանք կիրառելու համար, ամբողջ մի պետական համակարգ զբաղված է մի բանով` ապացուցել, որ ԱԺ-ում գլխավոր դատախազի ելույթում հնչած հանգամանքները համապատասխանում են իրականությանը»,- ասում է Մելանյա Առուստամյանը եւ շեշտում, որ անցած 10 ամիսների ընթացքում պետական համակարգին դա չի հաջողվել, եւ «ստիպված արդեն գալիս է դատավարության հրապարակայնության սահմանափակման ճանապարհը»: «Եկեք չմոռանանք նաեւ երկրորդ նախագահի` Ռոբերտ Քոչարյանի ելույթը, երբ նա ուղղակի հայտարարեց, որ երբ գործը կմտնի դատաքննական փուլ, մարդիկ անգամ կամաչեն, որ պաշտպանել եւ կանգնել են այդ մարդկանց կողքին: Ես նույնպես հայտարարում եմ, որ ոչ միայն չհիմնավորվեց դա, այլ այսօր հպարտ ենք, որ մենք այդ մարդկանց կողքին ենք»,- ավելացրեց Սուրեն Սիրունյանի պաշտպան Վարդուհի Էլբակյանը: Երեկ երեկոյան մեկ ամիս «Դատապարտյալների հիվանդանոց» քրեակատարողական հիմնարկում գտնվող Հակոբ Հակոբյանին տեղափոխել են Ազգային անվտանգության մեկուսարան: «Դեռեւս նրան չեմ տեսել, բայց իսկապես նրա առողջական վիճակը վատ է, եւ սա նրա նկատմամբ անմարդկային վերաբերմունքի, խոշտանգման դրսեւորում է: Այսինքն` սա եւս ճնշման մի ձեւ է, որպեսզի մեր պաշտպանյալները կորցնեն հավատն արդարացի դատաքննության նկատմամբ եւ ժողովրդական լեզվով ասած` կոտրվեն»,- կարծում է փաստաբան Մելանյա Առուստամյանը: