Ղարաբաղում գործող «Քաղաքացիական նախաձեռնությունների կենտրոն» հասարակական կազմակերպությունն օրերս տարածել է իր 2008 թվականի գործունեության մասին տեղեկատվությունը, ըստ որի, կենտրոնը այս տարվա փետրվար ամսում կլոր սեղան է կազմակերպել` «Նախկին ռազմագերիների, գերիների ու նրանց ընտանիքների անդամների խնդիրների սոցիալական տեսանկյունները» թեմայով, որում մասնակցություն են ունեցել Ղարաբաղի ՀԿ-ների, ԶԼՄ-ների ներկայացուցիչներ եւ նախկին ռազմագերիներ: Մայիսին կազմակերպվել է երկրորդ կլոր սեղանը, իսկ երրորդը` նոյեմբերին, որոնք հիմնականում վերաբերում էին նախկին ռազմագերիների խնդիրներին: Կենտրոնի նախաձեռնությամբ նախկին բանտարկյալների 4 երեխաների համար համակարգչային դասընթացներ են կազմակերպվել, որի արդյունքում նրանք ստացել են համապատասխան սերտիֆիկատներ: 3-ամսյա համակարգչային դասընթացներ են անցկացվել նաեւ նախկին ռազմագերիների երեխաների համար: «Դեկտեմբերի կեսերին կենտրոնը ավարտել է նախկին ռազմագերիների եւ անհայտ կորածների ընտանիքների անդամների հոգեբանական թերապիայի կուրսը: 2009-ին Քաղաքացիական նախաձեռնությունների կենտրոնը կշարունակի աշխատել նախկին ռազմագերիների, գերիների, ինչպես նաեւ նախկին բանտարկյալների եւ վերոնշյալ խավերի ընտանիքների անդամների, կրոնական փոքրամասնությունների հետ»,-ասվում է տեղեկատվության մեջ: Հիշեցնենք, որ կենտրոնը Ղարաբաղում գործում է 2002թ. հոկտեմբերից: Կազմակերպության գործունեությունն ուղղված է հիմնականում քաղաքացիական հասարակության ձեւավորմանը, քաղաքացիական ակտիվության բարձրացմանը, նախկին ռազմագերիների եւ նրանց ընտանիքների անդամների իրավունքների պաշտպանությանը, նրանց սոցիալական եւ հոգեբանական վերականգնմանը, հասարակությանն ինտեգրմանը, կրոնական եւ այլ փոքրամասնությունների իրավունքների պաշտպանությանը եւ այլն: Կենտրոնը հաշվետվություններ է պատրաստում, որոնք ներկայացվում են ԼՂՀ նախագահին եւ համապատասխան պետական մարմիններին, մի շարք միջազգային կազմակերպությունների, այդ թվում` Եվրոպայի Խորհրդին, ՄԱԿ-ին, ԵԱՀԿ-ին, ԿԽՄԿ-ին, Հենրիխ Բյոլի հիմնադրամին եւ այլն: 2003-ից կենտրոնը, հանրապետության իշխանությունների թույլտվությամբ, անց է կացրել պարբերական մոնիտորինգներ` Ղարաբաղի քրեակատարողական հիմնարկներում` ուշադրություն դարձնելով սանիտարահիգիենիկ, բժշկական սպասարկման, բարոյահոգեբանական վիճակի եւ այլ հարցերի վրա: Սակայն, 2007թվականի հունիսին Ոստիկանության ծառայության ղեկավարությունը մերժել է կենտրոնին շարունակել մոնիտորինգը: Մերժման կոնկրետ պատճառը, կենտրոնի տնօրեն Ալբերտ Ոսկանյանի խոսքերով, չեն պարզաբանել: Պատասխան չի եղել նաեւ նախկին նախագահին ուղղված այդ հարցի վերաբերյալ նամակին: 2008թ. նույն հարցով գրավոր դիմել են նաեւ գործող նախագահին եւ Ոստիկանության պետին, սակայն նամակներն անպատասխան են մնացել: