«Հայ կամավորականների համախմբում» նախաձեռնությունը այսօր տարածել է հայտարարություն, որում մասնավորապես ասվում է. «Վրաստանի իշխանությունները շարունակում են քաղաքական հալածանքը «Միասնական Ջավախք» Ժողովրդավարական դաշինքի անդամների` Վահագն Չախալյանի, Գուրգեն Շիրինյանի և նրանց ազգականների նկատմամբ դատական գործընթացը, ինչը տեղի է ունենում Հայաստանի իշխանությունների լուռ համաձայնության ներքո: Ջավախքում ազգային-քաղաքական գործիչներին մեկուսացնելը, բանտարկելը, բռնությունների ենթարկելը վրաց իշխանավորների ծրագրած և իրականացվող հակահայ քաղաքականության գործելաոճն է: Վրաստանի իշխանությունները Ջավախքի հայությանը առանց պատերազմ հայտարարելու պատերազմում են նրա դեմ, հայության հետ վարվում են որպես թշնամի երկրի բնակիչների, իսկ նրա լավագույն զավակներին գերևարելով, հարազատներին պատանդ պահելով, դատում են: Միայն անմիտները չեն հասկանա, որ սա արդեն իսկ պատերազմ է, իսկ պատերազմում թշնամուն որևէ պարագայում չեն ներում կամ համաներում։ Այս չհայտարարված պատերազմում ջավախքաբնակ հայությունը պատերազմում է մի քանի ճակատներով. 1. Ջավախքում ոչ սկզբունքային, սեփական հարստացման մասին մտածող, վարկաբեկված և ժողովրդից մերժված անձանց` հարմարվողների, ենթարկվողների դեմ, որոնք պատրաստ են հլու-հնազադ կատարել վրացական իշխանությունների ամեն մի հրաման, 2. Վրաստանի իշխանությունների դեմ, որոնք պետական բոլոր կառույցներով փորձում են հայաթափել Ջավախքը, 3. Թուրքիայի դեմ, որը փորձում է իրականացնել իր պանթուրքիստական դարավոր երազանքը` ցամաքային ճանապարհով կապվել Ադրբեջանի հետ: Թուրքիան ունեցել է ծրագիր Արցախը հայաթափելուց հետո, կտրելով Սյունիքը Հայաստանի հանրապետությունից, միանալ Ադրբեջանին: Սակայն դա նրան չհաջողվեց Հայ մարտիկի անձնազոհության և վճռականության շնորհիվ: Այժմ Թուրքիան այդ կապը փորձում է իրականացնել Հայաստանի հանրապետության հյուսիսով, Վրաստանի իշխանությունների ձեռքով` Ջավախքում, 4. Հայաստանի ներկայիս վարչակարգի դեմ, որոնք իրենց անօրեն իշխանությունը պահելու, Արևմուտքի հետ կապերը ամրապնդելու և Սահակաշվիլուն դուր գալու նպատակով ամբողջ Ջավախքը հանձնել են Թիֆլիսին: Այս պատերազմում ջավախքահայությունը միայնակ չէ: Նրա հետ է համայն հայությունը: Եվ որպեսզի հաղթանակը լինի նվազագույն կորուստներով, անհրաժեշտ է, որ Հայաստանի հանրապետությունում իրականացվի իշխանափոխություն, որպեսզի Ջավախքում ապրող մեր հայրենակիցներին, նրանց բոլոր իրավունքներին սատար լինի նաև Հայաստանի Հանրապետությունը իր պետական բոլոր կառույցներով»: