Այսօր «Որբաթ» ակումբում լրագրողների հետ հանդիպման ժամանակ ՀԱԿ համակարգող Լևոն Զուրաբյանը խոսեց ԵԽԽՎ մոնիտորինգային հանձնաժողովի և փաստահավաք խմբի գործունեության մասին: Բանախոսի վկայմամբ, ԵԽԽՎ մոնիտորինգային հանձնաժողովի որոշման մեջ թեև լուրջ քննարկվում է փաստահավաք խմբի գործունեությունը, բայց որևէ բառ չի ասվում մարտի մեկի խորհրդարանական հանձնաժողովի մասին: «Եկեք արձանագրենք, որ մարտի մեկի խորհրդարանական հանձնաժողովը այլևս որևէ մեկին չի հետաքրքրում: Բոլորն էլ հասկացան, որ դա կողմնակալ մարմին է, որի հետաքննությունը բացառապես ծառայում է իմիտացիայի շահերին: Եվ մարտի մեկի իրադարձությունների վերաբերյալ ճշմարտության բացահայտման հարցում որևէ խնդիր չի լուծում»,-նկատեց Լևոն Զուրաբյանը: ՀԱԿ համակարգողն ասում է, որ դեկտեմբերի 19-ի «Յոթի» դատավարությունը դատավարություն է ռեժիմի նկատմամբ: Իսկ մեղադրյալների աթոռին նստած են մարդիկ, որոնք մեղադրվում են միայն քաղաքական դրդապատճառներով. «Ամբողջ դատավարության իմաստն այն է, որ իշխանությունները փորձեն իրենց կատարած հանցագործությունների մեղքը բարդեն ընդդիմության վրա, դա վկայում է այն զավեշտալի իրողությունը, որ ենթադրյալ հանցագործները և նրանց ենթադրյալ հանցագործության զոհերը հանդես են գալիս դատավարության ընթացքում որպես միասնական թիմ, որը պայքարում է դատավորի և դատախազների թիմի դեր»: Լևոն Զուրաբյանը կոչ արեց ժողովրդին զգոն լինել, շարունակել մասնակցել դատավարություններին, լինել ակտիվ, քանի որ «սա դատավարություն է ոչ թե «Յոթի», այլ ողջ հայ ժողովրդի նկատմամբ»: