Ինչպես արդեն տեղեկացրել ենք, Գյումրիի նորընտիր քաղաքապետ Վարդան Ղուկասյանը ՏԻՄ ընտրություններից անմիջապես հետո խոստացել էր աշխատանքից ազատել այն բաժնի պետերին, ովքեր արհեստական խոչընդոտներ են ստեղծում` անհարկի տանել-բերելով ժողովրդին: Սակայն օրերս պարզվեց, որ իրականում քաղաքապետի նպատակը ոչ թե վատ կադրերից ազատվելն էր, այլ ՕԵԿ-ականներին աշխատանքի տեղավորելը: Մեր աղբյուրների փոխանցմամբ` այս կերպ Գյումրիի քաղաքապետը իր երախտագիտությունն է հայտնում ընտրություններում իրեն սատարած Ազգային անվտանգության քարտուղար Արթուր Բաղդասարյանին: նցած շաբաթ քաղաքապետը աշխատանքի ընդունեց ՕԵԿ-ական Ռուդիկ Հովհաննիսյանին` նրա համար փոխքաղաքապետի նոր հաստիք ստեղծելով, նմանապես իր կառույց հրավիրեց ՕԵԿ-ական Համլետ Սարուխանյանին` նրան առաջարկելով բավականին եկամտաբեր համարվող առևտրի ու սննդի բաժնի վարիչի պաշտոնը: Ի դեպ, վերջինս Արթուր Բաղդասարյանի ղեկավարած Եվրոպական քոլեջի Գյումրիի մասնաճյուղի տնօրենն է: Իսկ մշակույթի բաժնի ղեկավարի հաստիքը առաջարկեց իր երեխաների ուսուցչին` Գյումրիի մանկավարժական ինստիտուտի դասախոս, Հանրապետական կուսակցության անդամ Գրիգոր Աղանյանին, ով, ի դեպ, իր թեկնածությունը առաջադրեց ավագանու ընտրություններին, սակայն չանցավ: Տեղեկացնենք, որ մշակույթի բաժնի նախկին վարիչին` Արա Պապանյանին, որպես պատիժ քաղաքապետը գրեթե մատնեց պարապուդի` ուղարկելով Հովհաննես Շիրազի տուն-թանգարան` որպես տնօրեն: Զավեշտալին այն է, որ քաղաքապետը ժամանակին առիթ ունեցել էր աշխատել ՕԵԿ-ական կադրերից ոմանց, մասնավորապես Մոսկովյան շրջանի շրջկոմի քարտուղար Ռուդիկ Հովհաննիսյանի հետ, սակայն «յոլա չգնալու» պատճառով վերջինս «ընդմիշտ» հեռացել էր: Ընթերցողին տեղեկացնենք, որ խորհրդային տարիներին` իր կարիերայի սկզբում, Վարդան Ղուկասյանը մի քանի օրով աշխատել է որպես Մոսկովյան շրջկոմի քարտուղարի`Ռուդիկ Հովհաննիսյանի տեղակալ, այժմ դերերը փոխվել են: