Տեսանյութեր
Լուսանկարներ
Ղարաբաղում կքննարկվի քաղաքացիության մասին օրենքի նախագիծը
ԼՂՀ ազգային ժողովի երեկ կայացած լիագումար նիստում ակտիվ քննարկումներ ծավալվեցին «ԼՂՀ քաղաքացիության մասին» օրենքի նախագծի շուրջ, որը ներկայացրեց արդարադատության նախարար Նարինե Նարիմանյանը: Նա ծանոթացնելով օրինագծի դրույթներին, նշել է, որ նախագծի համաձայն ԼՂՀ քաղաքացիություն կարող է ստանալ 18 տարին լրացած այն անձը, որը վերջին երեք տարին մշտապես բնակվել է ԼՂՀ-ում, կարող է բացատրվել հայերեն լեզվով եւ ծանոթ է ԼՂՀ Սահմանադրությանը, ինչպես նաեւ այն անձը, ով ամուսնացել է ԼՂՀ քաղաքացու հետ կամ ունի ԼՂՀ քաղաքացի երեխա: Քաղաքացիություն կարող է շնորհվել նաեւ ԼՂՀ-ին բացառիկ ծառայություններ մատուցած անձանց:
Նախարարի ներկայացմամբ, ԼՂՀ երկքաղաքացի է համարվում այն անձը, որը ԼՂՀ քաղաքացիությունից բացի ունի նաեւ այլ պետության քաղաքացիություն: Քննարկումների ընթացքում միանշանակ չէին նաեւ պատգամավորների կարծիքներն այն ժամանակ, երբ նախարարը ներկայացրեց «Զինապարտության մասին» օրենքում առաջարկվող փոփոխությունը, որը վերաբերում էր երկքաղաքացիություն ունեցող անձանց պարտադիր զինվորական ծառայությանը: Մասնավորապես թեժ քննարկումները վերաբերում էին այն դրույթին, որի համաձայն, այլ պետության քաղաքացիություն ընդունած ԼՂՀ քաղաքացին չի ազատվում պարտադիր զինվորական ծառայությունից, անկախ այն հանգամանքից` ծառայել է նա այլ պետությունում, թե`ոչ:
Քանի որ կարծիքներն իրարամերժ էին եւ հարցերը շատ, գլխադասային հանձնաժողովի նախագահ Վահրամ Աթանեսյանն առաջարկեց օրենքն ընդունել առաջին ընթերցմամբ, ընդ որում՝ սահմանելով հետագա քննարկումների հատուկ ընթացակարգ: Առաջարկը հավանության արժանացավ եւ օրենքի երկրորդ ընթերցման ժամկետ սահմանվեց մինչեւ հաջորդ տարվա հունվարի վերջերը: Ինչպես նշվեց նիստի ընթացքում, քաղաքացիության մասին քննարկումները հնարավոր է շարունակվեն խորհրդարանական լսումների տեսքով:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել