Այսօր գլխավոր դատախազությունում հրավիրված ասուլիսի ժամանակ լրագրողները Հատուկ քննչական ծառայության ղեկավար Վահագն Հարությունյանից հետաքրքրվեցին, թե ինչո՞ւ մինչեւ հիմա չեն հարցաքննվել նախկին նախագահներ Լեւոն Տեր-Պետրոսյանը եւ Ռոբերտ Քոչարյանը, որոնք մարտի 1-2-ի դեպքերի հետ ունեցել են ուղղակի առնչություն:

«Դեռեւս շատ մարդիկ հարցաքննված չեն, եւ երբ նշվում է, որ գործի քննությունը շարունակվում է, ինքըստինքյան ենթադրում է նաեւ նոր մարդկանց հարցաքննություններ, հարցաքննվածների լրացուցիչ հարցաքննություններ` դրանից բխող բոլոր հետեւանքներով ու գործողություններով»,- մանրամասնեց Վ. Հարությունյանը: Ինչ վերաբերում է Ռոբերտ Քոչարյանի հարցաքննությանը, «եթե նրանից կոնկրետ հարցեր պարզաբանելու համար նույնիսկ այդ հարցն առաջանա, ապա, կարծում եմ, նախաքննական մարմինը կարող է հարցաքննել նաեւ նրան»:

«Եթե բազմաթիվ մարդիկ դեռ պետք է հարցաքննվեն, այդ դեպքում որքանո՞վ է ամբողջական եւ հիմնավորված «Յոթի գործով» նրկայացված մեղադրանքը: Չէ՞ որ այդ հարցաքննությունները կարող են ի հայտ բերել նոր հանգամանքներ»,- հարցրին լրագրողները: «Նախաքննությունը գտել է, որ հավաքված ապացույցները բավարար են այդ յոթ անձանց մասով գործը մեղադրական եզրակացությամբ դատարան ուղարկելու համար»,- նշեց ՀՔԾ ղեկավարը եւ մանրամասնեց, թե դա չի նշանակում, որ բացառվում է նախաքննության ընթացքում նոր հանգամանքների ի հայտ գալը. «Առհասարակ, ցանկացած այլ գործով նման հանգամանքը բացառելն ուղղակի հնարավոր չէ»: Իսկ թե երբ կզգացվի նախկին նախագահներին հարցաքննելու կարիքը, Վահագն Հարությունյանը չգիտի. «Կորող է մեկ տարի էլ անցնի, բայց դրա անհրաժեշտությունը չլինի»: