Այսօր Դե ֆակտո ակումբում այսպիսի եզրակացություն արեց ՀՅԴ խմբակցության անդամ Արծվիկ Մինասյանը. «Մեր բանկային համակարգը տնտեսության մեջ չի կատարում այն հիմնական ֆունկցիան, որի համար կոչված է»: Ա. Մինասյանը ասում է, որ բանկերը, բարձրացնելով ավանդների տոկոսադրույքները, հնարավորություն չեն տալիս տնտեսության մեջ հավաքագրել ազատ միջոցները. «Ստացվում է այնպես, որ բանկային համակարգը ինքն իրեն է պահում, դուրս է մղվում տնտեսությունից:Բարձր տոկոսադրույքների պայմաններում մենք այսօր ունենք բանկային համակարգ, որը ոչ միայն տնտեսության մրցունակության հատվածում հետ է մնացել, այլեւ` նպաստում է մենաշնորհային դիրքերի ամրապնդմանը»:

Պատճառը, ըստ Ա. Մինասյանի, պարզ է, քանի որ բանկը գումարն արագ ստանալու համար նկատի է ունենում ընկերության եկամուտների կանխատեսելիությունը. «Եթե դու մրցակցային շուկայում ես, հնարավոր է տանուլ տաս մրցակցիդ եւ չունենաս համապատասխան եկամուտ, հետեւաբար բանկի համար դառնում ես բարձր ռիսկային, իսկ այն մեկը, ով ունի մենաշնորհ դիրք շուկայում, բանկի համար նրա եկամուտները վստահելի են»:

Բանկային ոլորտում Ա. Մինասյանը բացասական է համարում նաեւ այն, որ ձեւավորվել են բանկեր, որոնք ֆինանսավորում են իրենց կառույցի ձեռնարկություններին. «Խոշոր բանկերից 8-9 այդպիսի կառույցներ են դարձել, ինչը տնտեսության համար բացասական է, քանի որ բանկերը տնտեսությունն աշխուժացնող կառույցներ են»: Ա. Մինասյանը գտնում է, որ բանկերը պետք է թանկ փողի քաղաքականությունից անցում կատարեն էժան փողի քաղաքականությանը:

Ասուլիսի մյուս բանախոսը` ՀԱԿ ներկայացուցիչ Վահագն Խաչատրյանը գտնում է, որ պրոբլեմը առաջացել է ԿԲ-ի նախկին նախագահ Տիգրան Սարգսյանի վարած քաղաքականության պատճառով: