«Ես չէի սպասում այն ուժգնությունը, որով տնտեսական ճգնաժամը անդրադարձավ Հայաստանի տնտեսության վրա,- այսօր Հայելի ակումբում հրավիրված բանավեճի ժամանակ հայտարարեց ԿԲ նախկին նախագահ Բագրատ Ասատրյանը:-Մեր վիճպետկոմի տվյալներով՝ սեպտեմբերի համեմատ մենք ունեցել ենք ՀՆԱ-ի անկում 8.3%-ով, արտահանման անկում՝ 15.6%-ով, և շինարարության անկում՝ 41%-ով»: Ըստ նրա` ունեալով այսպիսի թվեր`«նորմալ իշխանությունները պետք է առնվազն գլուխներըը բռնեին, բայց երևի գլուխ չունեն»: ԿԲ նախկին նախագահը փաստում է, որ վերջին ամիսներին մեր տնտեսության մեջ որակական տեղաշարժեր են կատարվել. «Տարեսկզբից նկատված աճի տեմպերի նվազումը, արտահանման զրոյական վիճակը, ներմուծման 40% աճի պարագայում այսպիսի զարգացում տեղի ունեցավ հոկտեմբեր ամսվա ընթացքում»: Չնայած դեռ չկան նոյեմբեր ամսվա տվյալները, բայց, նրա խոսքերով, այս միտումները շարունակվում են, և ակնհայտ է, որ տարին մենք փակելու ենք ավելի վատ տվյալներով: ԱԺ Տնտեսական հարցերի մշտական հանձնաժողովի նախագահ Վարդան Բոստանջյանը նույնպես չէր սպասում, որ տնտեսական ճգնաժամը նման ուժգնությամբ կազդի Հայաստանի տնտեսության վրա: Նրա համար փաստ է, որ տնտեսվարող սուբյեկտները և ֆինանսական կառույցները ընդգծված կերպով կրում են տնտեսական ճգնաժամի հետևանքները, բայց նա համոզված է, որ հնարավոր չէ անընդհատ բարձր մակարդակի տնտեսական աճ արձանագրել: Վարդան Բոստանջյանի խոսքերով՝ խոցելին այն է, որ պատասխանատվություն կրողները պետք է կարողանային մի փոքր ավելի շուտ սկսել հակաճգնաժամային միջոցառումները: Նա ամբողջությամբ չհամաձայնեց Բագրատ Ասատրյանի գնահատակաների հետ՝ ասելով, որ այդտեղ քաղաքական գործոն կա (նկատի ուներ Բ. Ասատրյանի ընդդիմադիր հայացքները): Բագրատ Ասատրյանը արձագանքեց. «Ես ի՞նչ ընդդիմադիր, ընդդիմադիրը Հայաստանի իշխանությունն է, որ չի ուզում տեսնել այն պրոբլեմները, որ այսօր երկիրը ունի, ընդդիմադիրը պառլամենտն է, որ խախտում է Սահմանադրությունը 80%-ով»: