ՀՀ ԱԳ նախարար Էդվարդ Նալբանդյանը այսօր հանդիպեց իր հրավերով Երեւան ժամանած ԵԱՀԿ գլխավոր քարտուղար Մարկ Պերեն դը Բրիշամբոյի հետ: Նախարարության Մամուլի եւ տեղեկատվության վարչության հաղորդմամբ՝ ողջունելով հյուրին` նախարար Նալբանդյանը նշել է, որ Հայաստանը, որպես ԵԱՀԿ անդամ պետություն, շահագրգռված է շարունակել համագործակցությունը ԵԱՀԿ գործունեության բոլոր երեք ոլորտներում եւ այդ առումով կարեւորում է կազմակերպության բարեփոխումը` այն առավել արդյունավետ դարձնելու նպատակով: Հայաստանի արտգործնախարարը նշեց նաեւ, որ Եվրոպան անվտանգության նոր ճարտարապետության կարիք ունի, որը պետք է հաշվի առնի գոյություն ունեցող բոլոր մտահոգությունները: Էդվարդ Նալբանդյանն ու Մարկ Պերեն դը Բրիշամբոն, ամփոփելով Հելսինկիում ԵԱՀԿ արտգործնախարարների հանդիպման արդյունքները, կարեւորեցին հանդիպման արդյունքում ընդունված փաստաթղթերում ԵԱՀԿ պատասխանատվության ոլորտում համագործակցության խթանմանն ուղղված դրույթների ամրագրումը: Խոսելով արցախյան հիմնախնդրի կարգավորման հնարավորությունների մասին` Էդվարդ Նալբանդյանն ընդգծել է ԵԱՀԿ դերակատարությունը հիմնահարցի հանգուցալուծման գործընթացում եւ կարեւորել Հելսինկիում ընդունված ԵԱՀԿ ԱԳ նախարարների հայտարարությունը եւ ԵԱՀԿ ՄԽ համանախագահ երկրների արտգործնախարարների հայտարարությունը արցախյան հիմնախնդրի կարգավորման վերաբերյալ: Զրուցակիցներն անդրադարձել են նաեւ ԵԱՀԿ Երեւանյան գրասենյակի գործունեությանն ու նրա կողմից իրականացվող ծրագրերին: Այդ առումով Էդվարդ Նալբանդյանը նշել է, որ Հայաստանը կարեւորում է ԵԱՀԿ մշտական գրասենյակի առկայությունը Երեւանում: