Այսօր Վիկտոր Դալլաքյանը մի շարք դիտարկումներ արեց վերջին շրջանում հայ-թուրքական հարաբերությունների ակտիվացման վերաբերյալ: Նա դրական է գնահատում Հայաստանի իշխանությունների ցանկությունը՝ հարաբերություններ հաստատել Թուրքիայի հետ առանց նախապայմանների, այն առումով, որ ցանկացած պետություն իր հարևանների հետ պետք է ունենա բնականոն փոխհարաբերություններ: Ըստ Դալլաքյանի` Թուրքիան, խախտելով միջազգայնորեն ընդունված նորմերը, Հաայստանը պահում է շրջափակման մեջ և նրա հետ հարաբերությունների կարգավորումը պայմանավորում Լեռնային Ղարաբաղի խնդրի ոչ հայանպաստ լուծմամբ. «Սա միջազգային իրավունքում անընդունելի երևույթ է, երբ մի պետություն իր հարաբերությունը մեկ այլ պետության հետ պայմանավորում է 3-րդ պետությանը վերաբերող փոխհարաբերություններով: Ըստ պատգամավորի՝ Թուրքիան ուզում է շարունակել այն փորձը, երբ 1921 թ. ռուս-թուրքական պայմանագրով Ռուսաստանի կողմից Նախիջևանը հանձնվեց Ադրբեջանին Թուրքիայի երաշխավորությամբ: Վ. Դալլաքյանի համար անընդունելի է ցեղասպանության հարցի ցանկացած քննարկում, քանի որ «կան պատմական փաստեր, և աշխարհի 20-25 պետություններ ճանաչել են հայոց ցեղասպանությունը»: Ըստ Դալլաքյանի՝ հայկական կողմը նաև շատ զգույշ պետք է մոտենա Թուրքիայի կողմից առաջ քաշված կովկասյան պլատֆորմ ստեղծելու գաղափարին: Պատգամավորը հիշեցնում է, որ այդ պլատֆորմի մեջ Թուրքիան, Հայաստանը չհաշված, առաջարկել է մտնել այնպիսի տարածաշրջանային պետությունների` Վրաստան, Ադրբեջան և Ռուսաստան, որոնց հետ, մեծ հաշվով, ինքը լուրջ պրոբլեմներ չունի: Իսկ քանի որ Հայաստանը ունի պրոբլեմներ և՛ Ադրբեջանի, և՛ Վրաստանի հետ, հետևաբար, Թուրքիան այս կերպ փորձում է իր վրա վերցնել արբիտրի դերը հայ-վրացական և հայ-թուրքական հարաբերություններում և ճնշումներ գործադրել Հայաստանի վրա: «Թուրքիայի ծրագիրը՝ պլատֆորմի հետ կապված, հեռահար է և Հայաստանի համար վտանգավոր»: Դալլաքյանի խոսքերով՝ Հայաստանը իրավունք չուներ ողջունել պլատֆորմի ստեղծումը, առավել ևս, որ ծանոթ չէ փաստաթղթին: