Այսօր Ստեփանակերտում մեկնարկեց «Մարդու իրավունքների պաշտպանությունը սահմանադրական արդարադատության պրակտիկայում» թեմայով ԼՂՀ Սահմանադրության օրվան եւ Մարդու իրավունքների համընդհանուր հռչակագրի 60-ամյակին նվիրված համատեղ կոնֆերանսը, որին մասնակցում են նաեւ ՀՀ Սահմանադրական դատարանի նախագահ Գագիկ Հարությունյանը, Գլխավոր դատախազ Աղվան Հովսեփյանը, Սահմանադրական դատարանի անդամներ: Իր ելույթում ԼՂՀ Ազգային ժողովի նախագահ Աշոտ Ղուլյանը հիշեցրեց, որ 2006-ի դեկտեմբերի 10-ին Արցախում սահմանադրական հանրաքվեի անցկացման արդյունքում ընդունվել է երկրի հիմնական օրենքը: «Իր հերթին ԼՂՀ սահմանադրական հանրաքվեն զուգադիպել է 1991թ. դեկտեմբերի 10-ին անցկացված ԼՂՀ անկախության հանրաքվեի օրվան, որի ժամանակ Արցախի բնակչությունը առաջնորդվել է գործող օրենսդրությամբ, իրացրել ինքնորոշման իր իրավունքը»,- շեշտել է ԱԺ նախագահը: ԼՂՀ նախագահ Բակո Սահակյանը, ողջունելով կոնֆերանսի մասնակիցներին, մասնավորապես նշեց. «Լեռնային Ղարաբաղի ժողովուրդը միշտ հավատարիմ է եղել ազատության, ժողովրդավարության գաղափարներին, ինչպես նաեւ այնպիսի իրավական պետության ստեղծմանը, որտեղ մարդու եւ քաղաքացու անվտանգությունն ու ազատությունը կլինեն բարձրագույն արժեք: ԼՂՀ Սահմանադրության ընդունումը մեկ անգամ եւս հաստատել է այդ գործընթացի անշրջելիությունը, եւ մեր ժողովրդի ձգտումն ու կամքը` ամբողջովին իրացնել ազատ եւ արդար հասարակությունում ապրելու իրավունքը, որտեղ կլինեն բոլորի համար զարգացման հավասար հնարավորություններ»: Նախագահն ընդգծեց նաեւ, որ այս կոնֆերանսը «նոր առիթ է գնահատելու ԼՂՀ նվաճումները` մարդու եւ քաղաքացու իրավունքների եւ ազատությունների ապահովման, քաղաքացիական եւ ժողովրդավարական հասարակության ձեւավորման գործում»: «Պետությունը, որպես մարդու եւ քաղաքացու իրավունքների պաշտպանության գլխավոր երաշխավոր, այսուհետ կլինի հետեւողական, եւ ավելի կակտիվացվեն ջանքերն այդ հարցում»,-ավելացրեց երկրի ղեկավարը: ՀՀ գլխավոր դատախազ Աղվան Հովսեփյանի համոզմամբ՝ «ի տարբերություն շատ երկրների, որտեղ մարդու իրավունքները ձեռք են բերվել ընդունված փաստաթղթերով, Ղարաբաղում այդ իրավունքները ձեռք են բերվել ազգային-ազատագրական պայքարով»: Իսկ ՀՀ Սահմանադրական դատարանի նախագահ Գագիկ Հարությունյանը համոզված է, որ Արցախ աշխարհում սահմանադրականությունը կարող է շատ ավելի շուտ ինքնահաստատվել, քան ցանկացած մեկ այլ երկրամասում, որովհետեւ «այստեղ սահմանադրորեն ապրելու ավանդույթները բավականին խորը արմատներ ունեն, որոնք պետք է կարողանանք գուրգուրել, որպեսզի ծլարձակվեն, որպեսզի սահմանադրականության իրողությունը Սահմանադրության հետ մեկտեղ դառնա մարդու կենցաղ»: Գագիկ Հարությունյանի խոսքերով՝ կոնֆերանսի հրավիրման գաղափարը պայմանավորված էր նաեւ այն հանգամանքով, որ հունվարից սկսած՝ ԼՂՀ Սահմանադրության սահմանված կարգով ԼՂՀ քաղաքացիները նույնպես ձեռք են բերում սահմանադրական արդարադատության իրավունք: Կոնֆերանսի աշխատանքները կշարունակվեն նաեւ վաղը: Կեսօրին կամփոփվեն երկօրյա աշխատանքների արդյունքները, որից հետո 1-2 ամսվա ընթացքում կհրապարակվեն կոնֆերանսի նյութերը: