Այսօր «Ուրբաթ» ակումբում հրավիրված ասուլիսի ժամանակ ասաց Ծաղկաձորի քաղաքապետ Գարուն Միրզոյանը եւ նշեց դրանցից ամենակարեւորը. «Նախատեսվում է հունվարի 20-25-ը Ծաղկաձորում անցկացնել լեռնադահուկային վարկանիշային միջազգային մրցաշար»: Գարուն Միրզոյանի մյուս նորությունները հիմնականում վերաբերում էին քաղաքի ինֆրաստրուկտուրաներին: «Արդեն շահագործման ենթակա է 3 կմ երկարությամբ նորակառույց ճանապարհը, ինչը կծառայի իբրեւ Ծաղկաձորի տուրիստական մուտք: Դա քաղաք չի մտնում, այլ Հրազդանի շրջանաձեւ խաչմերուկից ուղիղ միանում է ճոպանուղուն»: Քաղաքապետի խոսքերով` կառուցվել է նաեւ նոր, լուսավորվող սահուղի` սահնակների համար: Արդեն բացվել է նոր հյուրանոց եւ տպագրվել է քաղաքի տուրիստական քարտեզը: «Բացվել է ոստիկանության նոր բաժանմունք: Նախատեսում ենք բացել նաեւ փրկարարական ծառայություն` համալրված տրանսպորտային եւ տեխնիկական միջոցներով: Այս պահին Ծաղկաձորում կառուցվում է հիդրոօդերեւութաբանական մոնիտորինգի կայան, որը մի քանի ամսից կգործի»,- ասում է Միրզոյանը: Այս ամենի համատեքստում նա հատուկ ընդգծում է, որ Ծաղկաձորում գործազրկություն չկա. «Ամեն օր շրջակա բնակավայրերից գալիս են 300-500 աշխատողներ: Իսկ շինարարական սեզոնին այս թիվը մոտ 10 անգամ ավելանում է»: