"Թրանսփարենսի Ինթերնեշնլ" կազմակերպությունը կոռուպցիայի դեմ պայքարի միջազգային օրվա կապակցությամբ հրապարակել է տվյալներ աշխարհի տարբեր երկրներում կոռուպցիայի մակարդակի մասին: Հիմնական եզրակացությունն այն է, որ նոր տնտեսական "հսկաների" ընկերություններն ի հայտ են բերում կորպորատիվ կաշառակերության բարձր մակարդակ այլ երկրներում գործունեություն ծավալելիս: Ընդ որում` շինարարական, անշարժ գույքի, նավթի եւ գազի ոլորտներն ամենաշատն են հակված կոռուպցիայի: ԿՏՀ (կաշառք տվողների համաթիվ) 2008թ. աղյուսակի երկու հորիզոնականները կիսել են Բելգիան ու Կանադան: Սա նշանակում է, որ բելգիական ու կանադական ընկերությունները դիտվում են որպես իրենց երկրների սահմաններից դուրս կաշառարությամբ զբաղվելու ամենաքիչ հավանական ընկերություններ: Նրանց անմիջապես հաջորդում են երրորդ-չորրորդ տեղերը կիսող Նիդեռլանդներն ու Շվեյցարիան` ԿՏՀ 8.7 արժեքով: Աղյուսակը եզրափակում է Ռուսաստանը` ԿՏՀ 5.9 արժեքով` տեղ զբաղեցնելով Չինաստանից (6.5), Մեքսիկայից (6.6) եւ Հնդկաստանից (6.8) ներքեւ: ԿՏՀ-ն նաեւ ցույց է տալիս, որ պետական մարմինների հետ շփվելիս ամենաշատը կոռուպցիայի հակված են պետական պատվերներ կատարող և շինարարական ընկերությունները, և առավել հավանականն է, որ այդ ընկերություններն են ապօրինի կերպով ազդում պետական մարմինների քաղաքականության, որոշումների եւ գործողությունների վրա: