Բուլղարիայի Հանրապետության նախագահ Գեորգի Պրվանովի հրավերով վաղը նախագահ Սերժ Սարգսյանը երկօրյա պաշտոնական այցով կմեկնի Սոֆիա: Այս մասին հայտնում է նախագահի կայքէջը: Դիմավորման պաշտոնական արարողությունից հետո Բուլղարիայի նախագահ Գեորգի Պրվանովն առանձնազրույց կունենա Հայաստանի իր պաշտոնակցի` Սերժ Սարգսյանի հետ: Հանդիպմանը կհետեւեն հայ-բուլղարական բանակցություններն` ընդլայնված կազմով: Այնուհետեւ տեղի կունենա փաստաթղթերի ստորագրման արարողությունը եւ երկու երկրների ղեկավարների մամուլի ասուլիսը: Նախագահներ Սերժ Սարգսյանը եւ Գեորգի Պրվանովը կընդունեն այցի արդյունքների մասին համատեղ Հայտարարություն: Նախատեսվում է ստորագրել նաեւ 2009 թվականին Հայաստանում բուլղարական մշակույթի օրերի եւ 2010 թվականին Բուլղարիայում հայկական մշակույթի օրերի կազմակերպման ու անցկացման մասին մտադրությունների արձանագրություն, պետական կառավարման ոլորտում համագործակցության 2009-2014 թթ. աշխատանքային ծրագիր, արխիվային գործի բնագավառում համագործակցության համաձայնագիր, ինչպես նաեւ` երկու երկրների միջեւ եկամուտների ու գույքի կրկնակի հարկումը բացառելու մասին համաձայնագրում փոփոխություններ կատարելու մասին արձանագրություն: Երկու երկրների նախագահների մասնակցությամբ տեղի կունենա նաեւ հայ-բուլղարական բիզնես ֆորումի բացումը: Երկօրյա պաշտոնական այցի ընթացքում Հայաստանի ղեկավարը աշխատանքային ճաշ կունենա Բուլղարիայի վարչապետ Սերգեյ Ստանիշեւի հետ, կհանդիպի Ժողովրդական ժողովի նախագահ Գեորգի Պիրինսկուն, ծաղկեպսակ կդնի Անհայտ զինվորի հուշարձանին: Արտասահմանյան արվեստի ազգային պատկերասրահում երկու երկրների նախագահները ներկա կգտնվեն Սերգեյ Փարաջանովի կոլաժների ցուցահանդեսի բացմանը: Հայաստանի նախագահը կայցելի նաեւ Սոֆիայում մեր երկրի դեսպանություն: