ԼՂՀ Ազգային ժողովում 2009թ. պետական բյուջեի նախագծի երեկ կայացած քննարկման ժամանակ Քաղաքացիական ծառայության խորհրդի նախագահ Բորիս Առուշանյանն իր դժգոհությունն արտահայտեց պետական կառավարման համակարգում խրախուսման ֆոնդը 2 տոկոսով իջեցնելու փաստի առնչությամբ: Անցած տարի խրախուսման ֆոնդը կազմում էր աշխատավարձի ֆոնդի 3 տոկոսը, իսկ հաջորդ տարվանից, ֆինանսների փոխնախարարի հավաստմամբ, այն կկազմի 1 տոկոս: Քաղծառայության խորհրդի ղեկավարը կառավարությունից խնդրեց խրախուսման ֆոնդի չափը վերանայել` պատճառաբանելով քաղաքացիների ներկա սոցիալական վիճակը եւ ապրանքների գների աճը, ինչպես նաեւ համապատասխան մարմինների գործունեության արդյունավետության բարձրացման կարեւորությունը: Խրախուսման ֆոնդի վերանայման հարցն էր պնդում նաեւ Ազգային ժողովի աշխատակազմի ղեկավարը: Ճիշտ հակառակ կարծիքն արտահայտեց ԼՂՀ վերահսկիչ պալատի նախագահ Արթուր Մոսիյանը, որի համոզմամբ՝ աշխատավարձի 1 տոկոսի չափով խրախուսման ֆոնդը լիովին բավարար է պետական կառավարման համակարգում աշխատողներին խրախուսելու համար: Նա միաժամանակ նկատեց, որ շատ հաճախ խրախուսումը պարզապես վերածվում է լրացուցիչ աշխատավարձի, եւ այն ստանում են համարյա բոլորը, ինչը չի կարող խրախուսել գործունեության արդյունավետությունը: