«Հայելի» ակումբում այսօր մշակույթի գործիչների աշխատավարձերի թեման քննարկեցին Գ. Սունդուկյանի անվան թատրոնի դերասան Կարեն Ջանիբեկյանը և Կինոգործիչների միության նախագահ Ռուբեն Գևորգյանցը: Մշակույթի գործիչների աշխատավարձը սահմանված է 30-50 հազար դրամի չափ: Իսկ վերջերս դատավորների աշխատավարձի բարձրացումը մինչև մոտ 400 հազար դրամի Կարեն Ջանիբեկյանին այնքան էլ չէր մտահոգել: Ըստ դերասանի` դա չի նպաստում դատական համակարգում գոյություն ունեցող կոռուպցիայի նվազեցմանը: «Իհարկե ես կուզենամ, որ ժողովուրդը լավ ապրի, թող բարձրացնեն եռապատիկ, քառապատիկ, բայց դատավորի ձեռքը սովոր է փող վերցնելու, ինչքան էլ լավ ապրի, նա էլի կվերցնի: Պետությունը չի հետևում դատավորների գործին, չի նստեցնում այն դատավորներին, որոնք փող են վերցում, ստիպված որոշել է այսպիսի մի լավություն անի, որ նրանք ավելի լավ ապրեն ու կաշառք չվերցնեն»: Կարեն Ջանիբեկյանը ամեն ինչին հիմա փիլիսոփայորեն է մոտենում ու դա կապում է իր տարիքի հետ: Դերասանը ապրում է Գառնիում, ունի մեկ շուն, երեխաները տարբեր տեղերում են հաստատվել, ինքը հեքիաթային տուն է կառուցել ու հիմա շփվում է բնության հետ, վայելում է բնության կանչերը, գյուղական ծուխն ու հոտը: Լրագրողներին էլ խորհուրդ տվեց գնալ ու շփվել բնության հետ, այդ ժամանակ նրանք հանգիստ կթողնեն դատավորներին: «Մեր թատրոնում այնքան անշնորհք դերասաններ կան, որոնք ինձնից շատ են ստանում, բայց ես երբեք չեմ բողոքել տնօրենին: Եթե նա շատ է ստանում, ուրեմն նա դրա կարիքն ունի: Ես դրա կարիքը չունեմ: Ես ընդհանրապես ոչ մի բանի կարիք չունեմ»,-ասում է Սունդուկյանի անվան թատրոնի դերասանը: Մյուս բանախոսը` Ռուբեն Գևորգյանցը գտնում է, որ մշակույթի գործիչների աշխատավարձերը պետք է բարձրացնել, քանի որ հատկապես դերասանները աշխատում են ոչ թե 8 ժամ, ինչպես դատավորները, այլ 20 ժամ` ցրտին, արևին ու անձրևին: Ռուբեն Գևորգյանցը կատակով առաջարկեց մեկ ամսով դերասաններին տալ դատավորի պաշտոն, և նրանք մի քանի տարվա գումարը կլրացնեն այդ մեկ ամսում: «Որ մենք վատ ենք ապրում, դա փաստ է, որ մեզ ուշադրություն չեն դարձնում, դա էլ է փաստ, երևի այս երկրին դատավորներ են պետք, որովհետև ազգովի գող ենք, եթե դրանով ժողովուրդը լավ կապրի, թող բարձրացնեն»,-ամփոփեց Կարեն Ջանիբեկյանը: