«Զբաղվածության պետական ծառայության» գործակալության պետ Սոնա Հարությունյանը եւ նույն գործակալության Աշխատաշուկայի վերլուծության եւ կանխատեսումների բաժնի պետ Անահիտ Փարսադանյանը այսօր «Ուրբաթ» ակումբում անդրադարձան հայաստանյան աշխատաշուկայի վրա համաշխարհային տնտեսական ճգնաժամի ազդեցությանը: Հոկտեմբեր-նոյեմբեր ամիսներին գործակալությունը սկսեց ահազանգեր ստանալ. «Ահազանգերը հատկապես Հայաստանի լեռնաարդյունաբերական ձեռնարկություններից` Ագարակից, Ալավերդուց, Կապանից էին: Նրանք տեղեկացնում էին, որ սպասվում են կրճատումներ:Այժմ մենք իրականացնում ենք իրավիճակի գնահատում տեղերում»,- ասում է գործակալության պետը: Սպասվում է 1655 կրճատում ձեռնարկություններում: Վերջնական արդյունքները, սակայն, բացակայում են, քանի որ գնահատման պրոցեսը ընթացքի մեջ է. «Բայց մենք արդեն 2009թ ծրագրերը կազմելու ժամանակ օգտագործել ենք տարածքային ուղղվածությունը, ինչի հետեւանքով էլ նախատեսված է 10 անգամ ավելացնել ակտիվ ծրագրերի իրականացումը մարզերում: Մենք կունենանք դժվարություններ, բայց գոնե ժամանակավոր զբաղվածության համար կիրականացնենք միջոցառումներ»: Ձեռնարկատերերը, ըստ Ա. Փարսադանյանի, մայիս-հունիս ամիսների կանխատեսումներից ելնելով` վատատես չէին. «Հիմնականում փոքր կազմակերպություններն էին, որ մտածում էին, թե ճգնաժամի պատճառով կունենան աշխատողների թվի նվազում, սակայն այժմ իրական վիճակը կարող է նոր հետազոտություններից հետո փոխվել»: Գործակալության պետն էլ կարեւորում է միջազգային դոնոր-կազմակերպությունների օժանդակությունը. «Դեռեւս նրանց կարիքը կա, քանի որ եթե պետությունը խնդիր է դրել ինտեգրվել Եվրոպական ընտանիքին, ուրեմն, ինչպես մյուս երկրները, այնպես էլ Հայաստանը, պետք է ստանա համապատասխան օժանդակություն»: Անահիտ Փարսադանյանը տեղեկացրեց, որ բացի լեռնաարդյունաբերական ոլորտից ՏՏ ոլորտի Երեւանի գիտաարտադրական միավորները եւս կրճատումների հայտ են ներկայացրել. «Երեւանում 180 հոգու սպասում է կրճատում Հայկական լրատվական կենտրոնից»: Գործակալության պետը նշում է, որ իրենց հետազոտությունների արդյունքում պարզել են, որ 6000 թափուր աշխատատեղ կա . «Տարբեր տեսակի բարձր որակավորում պահանջող բանվորական մասնագիտություններ` էլեկտրաեռակցող, վարորդներ, խոհարարներ, մատուցողներ, մարզերում` բժիշկներ, ուսուցիչներ»: Նա նշում է, որ կրճատումների դեպքում պետք է ճիշտ գնահատվեն մարդկանց մասնագիտական կարողությունները, ինչը հնարավորություն կտա լրացնել թափուր աշխատատեղերը: Իսկ ինչու գործազուրկների առկայության դեպքում թափուր աշխատատեղերը չեն լրացվում. «Պատճառներից մեկը` երիտասարդների աշխատանքի ընդունման ժամանակ պահանջում են փորձաշրջան, կամ գործազուրկը չի համապատասխանում գործատուի պահանջներին` բարձր որակավորմամբ, նաեւ ցածր աշխատավարձն է պատճառը»: Ս. Հարությունյանը խորհուրդ է տալիս գործատուներին. «Որոշակի չափով կրճատեք Ձեր շահույթները եւ բարձրացրեք աշխատավարձերը, քանի որ վաղը չենք ունենա պահանջված աշխատուժը»: