Երեկ կայացած ԼՂՀ Ազգային ժողովի մշտական հանձնաժողովների համատեղ նիստում կառավարությունը ներկայացրեց «ԼՂՀ 2009թ. պետական բյուջեի մասին» օրենքի նախագիծը: Ֆինանսների փոխնախարարի խոսքերով՝ առաջարկվում է ԼՂՀ 2009թ. պետական բյուջեն հաստատել՝ եկամուտների գծով՝ 54052.144 մլն դրամ, ծախսերի գծով՝ 58542.1 մլն դրամ, իսկ դեֆիցիտը՝ 4490. 856 մլն դրամ:Ինչպես հայտնում են ԼՂՀ կառավարության տեղեկատվության եւ հասարակայնության հետ կապերի վարչությունից, նիստում ելույթ է ունեցել վարչապետ Արա Հարոււթյունյանը, որն ընդգծել է, որ կառավարության գործունեության ծրագրով նախատեսված միջին տարեկան 14 տոկոս իրական աճը կպահպանվի նաեւ տնտեսական այս ծանր իրավիճակում: Ըստ վարչապետի՝ 2009թ. փաստացի ծախսերը 2008-ի համեմատ կավելանան 6.5 մլրդ դրամով՝ հաշվի առնելով նաեւ կապիտալ ծառայություններից մուտքերի մոտ 600 մլն դրամի պակասուրդը: 2009թ. աշխատավարձի ֆոնդի ավելացումը կլինի 3.2 մլրդ դրամ եւ կկազմի 16.3 մլրդ դրամ: Սոցիալական ուղղության ավելացումները (թոշակներ, նպաստներ, փոխհատուցումներ եւ այլն) կկազմեն 2.2 մլրդ դրամ եւ կհասնեն 15.9 մլրդ դրամի: Կավելանան նաեւ գյուղատնտեսությանը տրամադրվելիք գումարները` շուրջ 900 մլն դրամով եւ ընդհանուր առմամբ կկազմեն 2.35 մլրդ դրամ՝ առանց վարկային ծրագրերի: Կապիտալ ներդրումները 2009-ին կկազմեն 12 մլրդ դրամ, որը 1.2 մլրդ դրամով պակաս է 2008-ի համեմատ: Վարչապետի տեղեկացմամբ՝ ծրագրվում է ստեղծել հիպոթեքային հիմնադրամ, որը արժեթղթավորելով այդ գործընթացը՝ կիրականացնի 3 մլրդ դրամից ավել ֆինանսավորում` ծրագրերի իրականացման համար: Բացի դրանից, պետական բյուջեով նախատեսվում է կապիտալ շինարարության ծրագրերի համար ներգրավել բանկային ռեսուրսներ մինչեւ 3 մլրդ դրամ՝ պետական երաշխիքներով, նախատեսվում է նաեւ 300 մլն դրամ՝ ներգրաված միջոցների սպասարկման համար: «Առաջին անգամ նաեւ թողարկելու ենք պետական պարտատոմսեր մինչեւ 1 մլրդ դրամի չափով, որը ուղղվելու է բյուջեի դեֆիցիտի կրճատմանը»,- նշել է Արա Հարությունյանը: Գործադիր իշխանության ղեկավարը 2009-ի պետական բյուջեն որակել է նախ՝ սոցիալական, նաեւ՝ հակաճգնաժամային, որը թույլ կտա պահպանել տնտեսական աճի բարձր տեմպեր: