ԱԺ խմբակցությունների ներկայացուցիչները այսօր անդրադարձան Հելսինկիում Հայաստանի եւ Ադրբեջանի ԱԳ նախարարների՝ երեկ ընդունած համատեղ հայտարարությանը եւ հայ-թուրքական հարաբերություններին: ՀՀԿ խմբակցության անդամ Էդուարդ Շարմազանովը գտնում է, որ Հելսինկյան հայտարարությունն ամրագրում է Մոսկովյան հռչակագրի սկզբունքները: Նրա հետ համամիտ էր ԱԺ փոխնախագահ, ՀՅԴ խմբակցության անդամ Հրայր Կարապետյանը:Անդրադառնալով Մեթյու Բրայզայի հայտարարությանը` Է. Շարմազանովը նշեց, թե Մ. Բրայզան պիտի գիտակցի, որ հայ ժողովուրդը չի պատկերացնում Ղարաբաղի կարգավիճակը անկախ Ադրբեջանի կազմում: Իսկ Հ. Կարապետյանին զարմացնում են ամերիկացի համանախագահի իրարամերժ հայտարարությունները: Նա գտնում է, որ ԱՄՆ-ն ներկայացնող քաղաքական գործիչը պետք է լուրջ վերաբերվի իր հայտարարություններին: Հայ-թուրքական հարաբերություննեի մասին Հ. Կարապետյանը ասաց, որ Հայաստանը քայլ արել է, սակայն թուրքական կողմից պատասխան քայլ չի եղել, ընդհակառակը` Թուրքիան շարունակում է Հայաստան-Թուրքիա դիվանագիտական հարաբերությունները պայմանավորել Ղարաբաղի հարցի ադրբեջանամետ լուծմամբ, նաեւ մերժում է ցեղասպանության փաստը: