Այսօր Գյումրիի Վարդան Աճեմյանի անվան դրամատիկական թատրոնում երկրաշարժից քսան տարի անց համերգով կրկին հանդես եկավ «Մոսկվայի վիրտուոզներ» նվագախումբը՝ գեղարվեստական ղեկավար, աշխարհահռչակ ջութակահար Վլադիմիր Սպիվակովի գլխավորությամբ: Թատրոնի դահլիճը երբեք այդքան մարդաշատ չէր եղել, եւ վերջին քսան տարվա ընթացքում հանդիսատեսը այդպիսի բավականություն չէր ստացել: Մոտ երկու ժամ տեւած համերգի ընթացքում հնչեցին գործեր տարբեր դասական ստեղծագործություններից: Իսկ վերջում Սպիվակովը փորձեց խոսել հայերեն. «Ես միշտ հիշում եմ երկրաշարժի ծանր օրերը, բայց չեմ խոսի այն մասին, թե ինչքան ենք արել, դա լավ չէ: Երբ ձախ ձեռքդ բարություն է անում, աջը պարտավոր է լռել: Կարծում եմ, որ շատերը գիտեն եւ հիշում են երկրագնդի ցանկացած կետում, որտեղ մենք եղել ենք, անպայման կգտնվի մի հայ մարդ, որը կմոտենա ինձ ու կասի՝ Վլադիմիր ջան, ցավդ տանեմ»: Ի դեպ, հանդիսատեսը մեծ դժվարությամբ լքեց դահլիճը, նրանցից ոմանք էլ դժգոհեցին, որ թեեւ համերգի մուտքը հրավիրատոմսով է եղել, սակայն իրենց երեք հազար դրամով տոմս են վաճառել: