Դեռ 2008 թ. աշնան սկզբներից պայթած տնտեսական ճգնաժամի հետևանքները ողջ աշխարհում օրեցօր ավելի առարկայական են դառնում: Հայաստանյան մասնագետները գրեթե միահամուռ կերպով այն կարծիքն են հայտնում, որ տնտեսական ճգնաժամի ազդեցությունը մենք էապես զգալու ենք այս տարվա մարտ ամսին: Արտասահմանում գների անկումը նկատելի է բոլոր ոլորտներում, այդ թվում` անշարժ գույքի շուկայի: Թե ինչ փոփոխություններ է կրել անշարժ գույքի հայաստյան շուկան, Հետքը փորձեց պարզել «Ակցեռն» անշարժ գույքի գործակալության նախագահ Հակոբ Բաղդասարյանից: «Ակցեռն» անշարժ գույքի գործակալության նախագահ Հակոբ Բաղդասարյանը անշարժ գույքի շուկայում տնտեսական ճգնաժամի պատճառով առկա գնային միտումների մեջ առարկայական փոփոխություններ չի արձանագրել. «Իհարկե, գնային թեթեւ անկումներ նկատվեցին, բայց հասարակությունը գների առումով ընդհանուր առմամբ դիմադրում է, չնայած ընդհանուր ակտիվության պակաս կա»: Հ. Բաղդասարյանը ակտիվության նվազումը պայմանավորում է շուկայում սպասողական տրամադրություններով. «Գնային անկումները բազում ինվեստիցիոն ծրագրերի հետ են կապված, և այսօր էլ բնական է, որ քաղաքացին կամ ներդրողը մինչև վերջ կպայքարի, որ իր ծրագրավորած բիզնեսի շրջանակներում միայն գործառնությունն իրականացնի, այսինքն` չեն շտապում և փորձում են ճգնաժամը հաղթահարել սպասողական վիճակով»: Հ. Բաղդասարյանի գնահատականով` այսօր արդեն կրկնակի նվազել է պահանջարկը, ինչի արմատները նա տեսնում է բանկերի ֆինանսավորման ռիսկայնության մեջ: Սակայն, ըստ գործակալության նախագահի, այն չի կարող հանգեցնել նույն չափով գների անկման, քանի որ պահանջարկի ամեն մի անկում չի կարող բերել գների նվազման. «Երբ մարդու գործունեությունը կապված է գույքի վաճառքի կամ փոխանակման հետ, նա պահանջարկի ամեն մի անկման հետ չի կարող իր գույքի գինը 50 տոկոսով նվազեցնել, նա մեկ տարվա կտրվածքով կարող է առավելագույնը 5 տոկոսով գինը իջեցնել, իսկ գնային էական տարբերություններ կարող են նկատելի դառնալ միայն մի քանի տարիների կտրվածքով»: Հակոբ Բաղդասարյանը չբացառեց, որ սպասողական վիճակը կարող է հանգեցնել ինչպես գների նվազման, այնպես էլ գների աճի: Նա հիշեցնում է, որ 2001 թ.-ից անշարժ գույքի շուկայում գների աճի ընդգծված միտում կա. այս տարիներին այն աճել է մոտ 300 %-ով: Դրա համար էլ, Հ. Բաղդասարյանի խոսքերով, միայն այն բանից հետո, երբ այս ճգնաժամային իրավիճակի մեջ ինչ-որ պարզություն կմտնի, այդ ժամանակ հասկանալի կլինի` գները կնվազեն, թե ընդհակառակը: Ի դեպ, Հակոբ Բաղդասարյանը վերջին տարիներին գների բարձրացումը կապում է ոչ միայն շինանյութի կրկնակի թանկացման, դեպի Հայաստան մտնող տրանսֆերտների ավելացման հետ, այլ Հայաստանում արժեթղթերի շուկայի բացակայության հետ, որի արդյունքում մեծածավալ ներդրումներ են տեղի ունենում հենց անշարժ գույքի շուկայում: Նրա մեկնաբանմամբ` տնտեսական ճգնաժամը բերում է ինվեստիցիոն ծրագրերի փոփոխության և առավել ազդում է «հատակի» վրա, որտեղ ընդունվում են որոշումները ինվեստիցիոն ծրագրերի մասին: Անշարժ գույքի գործակալության նախագահի խոսքերով` իրենք էլ իրենց գործակալության ծրագրերի մեջ որոշակի ծրագրային փոփոխություններ են նախատեսել, սակայն հակաճգնաժամային միջոցառումները իրենց ռազմավարության մեջ այնքան էլ մեծ տեղ չեն զբաղեցնում, «քանի որ կայուն ընկերությունները երկարատև ծրագրերով են աշխատում, և ճգնաժամը ուղղակի բերում է ինքնաակտիվացնող գործընթացների, այսինքն` մի շարք քայլերի իրականացումն արագացնում ես, որոնք այլ պայմաններում կարող էիր հետաձգել, անհրաժեշտ են դառնում ավելի հավասարակշիռ քայլերը, որոնք պարունակում են հակաճգնաժամային տարրեր»: Որպես նման քայլ Հ. Բաղդասարյանը մատնանշեց իրենց նախաձեռնությունը մասնաճյուղ բացելու ԱՄՆ-ում, որն այլ պարագայում միգուցե իրականացնեին 2011 թ.-ին: Վերջում Հետքի խնդրանքով պարոն Բաղդասարյանը անդրադարձավ նաև պահանջարկ - առաջարկ ընդհանուր իրավիճակին անշարժ գույքի շուկայում: Ըստ նրա` այժմ էլ ավելի շատ ձգտում են տուն գնել Երևանում կամ երևանամերձ հատվածներում, չնայած անգամ մոտակա մարզերի հետ համեմատած` Երևանում տների գինը բարձր է մոտ 4 անգամ: Դրա համար էլ, նրա կարծիքով, այնքան էլ անհամեմատելի չեն մարդկանց ֆինանսական հնարավորությունները և առաջարկվող գույքի գները. «Ճիշտ առաջարկությունը ծնում է նաև պահանջարկ, պարտադիր չէ, որ պահանջարկը այդ քանակությամբ լինի, որ առաջարկ ձևավորվի»: