Այսօր «Հայելի» ակումբում Հայ ազգային կոնգրեսի ներկայացուցիչ Հրանտ Բագրատյանը անդրադարձավ ՀՀ նախագահի կողմից քաղբանտարկյալներին համաներում շնորհելու  հանգամանքին: Վերջինս նշեց, որ այդ երևույթի  համար ուրախ չէ, քանի որ այդ մարդիկ քաղբանտարկյալ են, ներումն էլ անհասկանալի է, թե ինչի համար է, բայց Հ. Բագրատյանը կարևորեց մարդկային գործոնը: «Մարդ կա, որ այնտեղ կորցրել է առողջությունը»,-ասաց Հ.Բագրատյանը: ՀԱԿ ներկայացուցիչը հիացած է քաղբանտարկյալների արիությամբ, և լրագրողների այն հարցին, թե արդյոք նրանց կարելի է «թույլ օղակ» համարել, քանի որ ներում են խնդրել, Հ. Բագրատյանը պատասխանեց. «Ինչքան էլ մենք ունենանք երկակի վերաբերմունք այդ ներողության նկատմամբ, այդ մարդիկ արժանի են հարգանքի, նրանք թույլ օղակ չեն»: Հ. Բագրատյանը փաստեց, որ Հայ ազգային կոնգրեսի վերաբերմունքն էլ է այդպիսին: Անդրադառնալով «Յոթի գործի» դատավարությանը, որին մեկ անգամ մասնակցել է, բանախոսը նշեց, որ ինքն առաջին անգամ է տեսնում ոստիկանների նման պահվածք, երբ ոստիկանը մոտենում ու սկսում անմիջապես հայհոյել. «Ես առաջին անգամ եմ տեսնում «գողական ոստիկանություն», որպես կանոն ոստիկանությունը պայքարում է այդ տեսակի դեմ: Նույն ձևի դատավորներն են ու դատախազները, պետությունը կգնա ինքնակործանման նման ձևի պահվածքով»: Դժգոհելով իշխանության գլուխ կանգնածների պահվածքից` նախկին վարչապետը փաստեց, որ իրեն կառավարությունից հարկավոր է ստանալ կառավարությունում իր աշխատելու մասին մի տեղեկանք, որը Հ. Բագրատյանը արդեն մեկ ամիս է չի կարողանում ստանալ: «Ինձ ասում են` Վիկիպեդիայից վերցրու: Այս տեսակի մարդիկ կառավարում են պետությունը, ինչ մանրապճեղ տեսակ է կառավարում: Իրենց տեղեկանքը իրենց մնա»,-վրդովված ասաց Հ.Բագրատյանը: