Սերժ Սարգսյանն այսօր ընդունել է Հավաքական անվտանգության պայմանագրի կազմակերպության գլխավոր քարտուղար Նիկոլայ Բորդյուժային: Այս տարի կազմակերպությունում նախագահում է Հայաստանը, եւ ՀԱՊԿ խորհրդի նախագահ Ս. Սարգսյանը Ն. Բորդյուժայի հետ քննարկել է հերթական գագաթնաժողովի նախապատրաստման, օրակարգի ձեւավորման հետ կապված հարցեր: Այս մասին հայտնում է նախագահի մամլո ծառայությունը: Աղբյուրի փոխանցմամբ` մեր երկրի ղեկավարը կարևորել է ՀԱՊԿ գործունեության մշտական կատարելագործումը և նշել, որ այն թույլ կտա ավելի արդյունավետ դիմակայել ժամանակակից մարտահրավերներին: «Հենց այդ նպատակին էր ուղղված Կազմակերպության անդամ պետությունների ղեկավարների`անցյալ տարվա դեկտեմբերին Ղազախստանում կայացած ոչ պաշտոնական հանդիպումը»,- ընդգծել է Սերժ Սարգսյանը։ ՀԱՊԿ գործունեության առանցքային ուղղություն համարելով ռազմական-քաղաքական փոխգործակցությունը, նա ասել է, որ Հայաստանը շարունակելու է ջանքերը համատեղ աշխատանքը կոորդինացնելու, գործակցության ներուժն ավելի լիարժեք ու արդյունավետ օգտագործելու ուղղությամբ: Կողմերը քննարկել են նաև Կազմակերպության առջև  ծառացած հիմնական խնդիրներն ու դրանց լուծման ուղիները: