Նախագահ Սերժ Սարգսյանի նախօրեին ստորագրած հրամանագրով Վճռաբեկ դատարանի քրեական պալատի դատավորներ են նշանակվել Համլետ Ասատրյանը, Ելիզավետա Դանիելյանն եւ Արթուր Պողոսյանը։ Այս մասին հայտնում է նախագահի մամլո գրասենյակը: Աղբյուրի փոխանցմամբ` նախագահ Սարգսյանինույն հրամանագրով Վճռաբեկ դատարանի քաղաքացիական և վարչական պալատի դատավորներ են նշանակվել Սուրեն Անտոնյանը, Արտակ Բարսեղյանը, Մամիկոն Դրմեյանը, Էրնա Հայրինյանը, Անատոլի Մաթևոսյանը, Տիգրան Պետրոսյանն եւ Ելենա Սողոմանյանը։ Ավելի վաղ նշանակված անձինք զբաղեցրել են Երևան քաղաքի Աջափնյակ և Դավթաշեն համայնքների ընդհանուր իրավասության դատարանի, Վերաքննիչ քրեական դատարանի, Հյուսիսային և Հարավային քաղաքացիական դատարանի դատավորների և նախագահների պաշտոնները։ Անցյալ տարվա հունվարի 1-ից Հայաստանի Վճռաբեկ դատարանն ուներ 8 դատավոր։ Սակայն նախորդ տարվա դեկտեմբերի 26-ին Ազգային ժողովը փոփոխություններ կատարեց Դատական օրենսգրքում, ինչի արդյունքում դատավորների թիվը 8-ից դարձավ 17: Այս տարվա հունվարի 12-ին ավելացված հաստիքների համար թեկնածուներ Սերժ Սարգսյանին առաջարկել էր Արդարադատության խորհրդը։