Արմեն Մարտիրոսյան. «Առանց ապացուցողական հիմքի քաղաքական դատավարություն է»
«Ժառանգություն» խմբակցության նախագահ Արմեն Մարտիրոսյանը այսօր Դե ֆակտո ակումբում այսպես է որակել «Յոթի գործի» դատավարությունը: Ա. Մարտիրոսյանը այսպես արտահայտվելու առիթ ունի իր հետ կապված դրվագի մասով: Նա որպես տուժող է հանդես գալիս դատավարության ընթացքում. «Ինձ դանակահարողին չեն գտել, բայց որպես մեղադրյալ նշում են այդ մարդկանց, ինչպես դա կարող է լինել»:
Մեղադրվողների շարքում է Մյասնիկ Մալխասյանը, որի եղբայրը, ըստ Ա. Մարտիրոսյանի վկայության, եւս վնասվել է շպրտվող քարերից. «Ինչպես կարող էր Մյասնիկ Մալխասյանը հրահրել անկարգություններ, երբ իր եղբայրները փորձում էին պաշտպանել ոստիկաններին պրովոկատորներից»: Իսկ Ա. Մարտիրոսյանը համոզված է, որ պրովոկատորներ եղել են. «Առանց ապացուցողական հիմքի քաղաքական դատավարություն է»:
Ա. Մարտիրոսյանը անդրադարձավ նաեւ դատական նիստերի հետաձգմանը. «Եթե իշխանություններն ուզենային իսկապես դատավարությունը իրականացնել, կարող էին հանգիստ կիրառել Ջհանգիրյանի դատի փորձը, երբ սկզբից դատավորն է գալիս, այնուհետեւ` Ջհանգիրյանը»:
Խմբակցության նախագահը նախ համոզված է, որ դատը իրականացնում են իրականում իշխանությունները, իսկ դատավարության հետաձգումը հիմք չունի, քանի որ մարդը կարող է իր խախտման համար պատժվել. «Ընդամենը մեկ անգամ է մարդը պատժվում խախտման համար, կարող էին տուգանք նշանակել կամ մեկ անգամ հետաձգել, այսինքն` գործը անձնավորվում է»:
Դատը, ըստ բանախոսի, սկսեցին հետաձգել, երբ Գրիգոր Ոսկերչյանը ցանկացավ հայտարարել, որ իր նկատմամբ մեկուսարանում բռնություն է իրականացվել. «Այդ պահից սկսած ընկան իրենց թակարդը»:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել