Արա Նռանյանը վերլուծեց տնտեսական ճգնաժամի ազդեցությունը
Այսօր Ուրբաթ ակումբում ՀՅԴ ներկայացուցիչ, ԱԺ պատգամավոր Արա Նռանյանը վերլուծեց տնտեսական ճգնաժամի ազդեցությունը Հայաստանի տնտեսության վրա:
Նա նախ ուշադրության հրավիրեց այն փաստին, որ տնտեսական ճգնաժամը հանգեցրեց նավթի գնի ավելի քան երեք անգամ անկմանը , ինչը կարեւոր է այն առումով, որ նվազում են տրանսպորտային ծախսերը. «Տրանսպորտային ծախսերը մեծ կշիռ են կազմում ապրանքների ներկրման եւ արտահանման փաթեթում, այս առումով տրանսպորտային ծախսերը պետք է նվազեն»: Ճգնաժամը, ըստ բանախոսի, Հայաստանի ներքին շուկայի եւ ներքին տնտեսական քաղաքականության առումով հանգեցրել է դրական հետեւանքների. «Ազատվում ենք երկնիշ տնտեսական աճի մոլուցքից, ՀՅԴ-ն միշտ էլ նշել է, որ կարեւոր է ոչ թե տնտեսական աճի չափը, այլ` որակը»:
Արա Նռանյանը ասում է, որ աշխարհում պարենային առումով ճգնաժամ չկա, որովհետեւ «այնքան վատ չէ ֆինանսատնտեսական վիճակը, որ աշխարհը մատնվի սովի: Այս առումով մենք ունենք մեծ ռեսուրս գյուղատնտեսության մասով, որը շատ չնչին ենք օգտագործում»: Սակայն ճգնաժամը խոչընդոտում է թանկարժեք ապրանքների գնմանը` անշարժ գույք, էլեկտրոտեխնիկա. «Ճգնաժամի առաջացրած մյուս խնդիրը աշխատատեղերն են, ուստի մենք պետք է պահպանենք եւ ստեղծենք աշխատատեղեր»: Նման հնարավորություն, ըստ բանախոսի, կարող է տալ մարզերում փոքր արտադրությունների հիմնումը. «Մեր տնտեսությունն այսօր մեծապես կախված է ներմուծումից, իսկ մենք ասում ենք տեղական արտադրության խրախուսում, այս ճգնաժամը թույլ տվեց հասկանալ, որ խնդիրները հնարավոր են լուծել միայն այս եղանակով»: Ա. Նռանյանը հարց է տալիս, թե ինչու Հայաստանում ընդամենը երեք գարեջուր արտադրող ընկերություն կա, իսկ Գերմանիայում` ամեն գյուղում. «Մեր գարեջուր ներմուծողները միլիոնավոր դոլարներ աշխատեցին, կարող ենք խրախուսել, որպեսզի փոքրիկ արտադրություններ հիմնեն այստեղ, ինչը մրցակցություն կապահովի, նաեւ գումարները չենք ուղարկի դուրս»:
Դոլարի նման կուրսի պայմաններում, ըստ բանախոսի, ներկրումը ավելի է հեշտանում, իսկ ճգնաժամը, ըստ պատգամավորի, ավելի է մեծացնելու ներկրման ծավալը Հայաստան. «Կառավարությունը պետք է գումարներ ուղղի ոչ թե դրամի փոխարժեքի պահպանմանը, այլ ուղղի իրական հատված` փոքր եւ միջին ձեռնարկությունների զարգացմանը»: Ա. Նռանյանը գտնում է, որ կառավարության նման օգնությունը կլուծի նաեւ աշխատատեղերի խնդիրը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել