Այսօր ՀԱԿ մամլո խոսնակ Արման Մուսինյանը անդրադարձավ Հատուկ քննչական խմբի ղեկավար Վահագն Հարությունյանի` 2 օր առաջ հնչեցրած հայտարարությանը, որ ընդդիմության կողմից տարածված տեսաերիզում զինվող երիտասարդը պայմանագրային զինծառայող է` վարորդ, որին այդ օրը պաշտպանության նախարարության կողմից ոստիկանությանը տրամադրած տրանսպորտային միջոցներն ուղեկցող շարասյան ավագը ի պահ է տվել իր զենքը, և որ այդ զենքը իրականում չի կիրառվել: «Մենք շնորհակալ ենք, որ Վահագն Հարությունյանը սեփական կամքով խոստովանեց, որ մարտի 1-ին բանակը զինված ներգրավված է եղել միջոցառումների մեջ»,- ասաց ՀԱԿ մամլո խոսնակը: Բայց, այնուամենայնիվ, ըստ Մուսինյանի` Վահագն Հարությունյանի խոսքում տեղ են գտել «մի շարք ստեր», որոնք իրենք կներկայացնեն հանրությանը: Բայց ասուլիսի ժամանակ Մուսինյանը սահմանափակվեց ընդամենը մի քանի հարցադրումներով: Ըստ նրա` անհրաժեշտ է իմանալ` ով է շարասյան ավագը, ում մասին Վահագն Հարությունյանը նշում է, որ բնական կարիքները հոգալու պատճառաբանությամբ զենքը հանձնել է վարորդին ու հեռացել, հարուցվել է, արդյոք, քրեական գործ այս կապակցությամբ, քանի որ զենք կրող մարդիկ իրավունք չունեն զենքը հանձնել ուրիշին, ենթարկվել է այդ զենքը փորձաքնության, թե ոչ, որպեսզի պարզվի` նրանից կրակ արձակվել է, թե ոչ: Բացի այդ, եթե վարորդը պայմանագրային զինծառայող է, ինչու է քաղաքացիական հագուստով: Ըստ Հայ ազգային կոնգրեսի տեղեկությունների` Վահագն Հարությունյանի կողմից նշված զորամասը սահմանամերձ զորամաս է, որի առաջնային խնդիրն է` պաշտպանել Հայաստանի պետական անվտանգությունը: «Բայց մարտի 1-ի առավոտյան բոլորը բերվել են Երևան, ավելին` Երևան են բերվել ներքին զորքերի ատոմակայանի պահպանությունն իրականացնող զինվորները, այսինքն` որոշ ժամանակ ատոմակայանը եղել է ոչ պաշտպանված վիճակում»,- հայտարարեց Մուսինյանը: Վահագն Հարությունյանը պարզաբանել է նաև, որ դիմակավոր անձանց կողմից արձակված փամփուշտները եղել են անգնդակ: Արման Մուսինյանը սրանից եզրակացրել է, որ Հատուկ քննչական ծառայությանը հայտնի են դիմակավոր անձանց անունները, որը հասարակությունը ևս կարիք ունի իմանալու: Արման Մուսինյանի խոսքերով` Վահագն Հարությունյանի այս բացահայտումը պայմանավորված է փաստահավաք խմբի աշխատանքով, ու Հայ ազգային Կոնգրեսի ճնշման տակ Հատուկ քննչական ծառայությունը եւ Վահագն Հարությունյանը դեռ ստիպված են լինելու «խելոք-խելոք այլ բացահայտումներ էլ անել սեփական ձեռքով, ինչպես սկզբից հերքում էին, որ մարտական հրազեն չի կիրառվել, հետո ընդունեցին, հերքում էին, որ դիպուկահար չի եղել, ընդունեցին, հերքում էին, որ բանակը ներգրավված է եղել, ընդունեցին»: