Այսօր կառավարությունում տեղի է ունեցել Եվրոպական Միության հետ ՀՀ համագործակցության ազգային խորհրդի նիստ: Կառավարության կայքէջը տեղեկացնում է, որ խորհրդին  ներկայացվել է Եվրոպական հարեւանության քաղաքականության շրջանակներում ՀՀ-ԵՄ գործողությունների ծրագրի իրականացման ընթացքը, որն արժանացել է հավանության։Վարչապետ Տիգրան Սարգսյանն առաջարկել է խորհրդում քննարկել ընդհանրական համագործակցության գաղափարախոսությունը եւ համագործակցության ծրագրի ներքո իրականացվելիք գործողությունները։ Նա ընդգծել է, որ հանձնարարված է բոլոր գերատեսչություններին` իրենց ոլորտների գծով ներկայացնել համագործակցության գործողությունների ծրագրեր, որոնք ամփոփվելուց եւ ազգային խորհրդի հավանությանն արժանանալուց հետո, կներկայացվեն ՀՀ կառավարության քննարկմանը։ Խորհուրդը հավանություն է տվել նաեւ Եվրոպական հարեւանության եւ գործընկերության գործիքի (ԵՀԳԳ) ներքո իրականացվող` Թվինինգ, Թայեքս, Սիգմա եւ Անդրսահմանային համագործակցության ծրագրերի ընթացքին եւ Բյուջետային աջակցության ծրագրին։ Նիստում խորհուրդը փոփոխություններ եւ լրացումներ է կատարել ՀՀ կառավարության թիվ 1282-Ն որոշման մեջ, ըստ որի, վերնագիրը շարադրվել է նոր խմբագրմամբ` «ԵՀՔ շրջանակներում ՀՀ-ԵՄ գործողությունների ծրագրով նախատեսված 2009-2011թթ. իրականացվելիք գերակա խնդիրների եւ առաջնահերթ միջոցառումների իրականացման նպատակով ԵՄ-ի հետ ՀՀ համագործակցության ազգային խորհուրդ եւ ԵՄ-ի հետ ՀՀ համագործակցությունը համակարգող հանձնաժողով ստեղծելու, դրանց կանոնադրություններն ու կազմերը հաստատելու մասին» ։ Համապատասխան փոփոխություններ են կատարվել ազգային խորհրդի կանոնադրության մեջ։ Նիստում առաջարկվել է ազգային խորհրդի կազմում եւս փոփոխություն կատարել` ընդգրկելով մի շարք հասարակական կազմակերպությունների, որոնք հրավիրված էին նիստին։ Վերջիններս, առաջարկը քննարկելուց եւ իրենց համաձայնությունը գրավոր ներկայացնելուց հետո, կընդգրկվեն խորհրդի կազմում։