Արդեն ավելի քան երկու ամիս է, ինչ Նարեկ Հարթունյանը Ձեր միջոցով փորձում է ինձ ներքաշել հրապարակային վեճի մեջ:

Ինչպես Ձեզ հաղորդեցի մեր առաջին և միակ հեռախոսազրույցի ժամանակ, մենք՝ Ն. Հարթունյանը և ես, հանրային գործիչներ ենք, իսկ մեր վեճը մասնավոր բնույթ է կրում: Այդ վեճն այժմ դատարանի քննությանն է հանձնված, ընդ որում դատարան առաջինը դիմել են Հարթունյանները: Արդ, թող բարի լինեն սպասել այդ մարմինների որոշումներին և կայացրած վճիռներին:

Այստեղ ցանկանում եմ տեղյակ պահել Ձեզ, որ Հարթունյանների կողմից նշանակված առաջին փաստաբանը, ով Հանրապետության ամենաազդեցիկ իրավաբաններից է, համարյա հաջողել էր բանակցությունների միջոցով Հարթունյանների և իմ միջև ձեռք բերել ընդհանուր համաձայնություն, սակայն անհասկանալի պատճառներով 2010 թվականի դեկտեմբերին նրանք խզեցին այդ իրավաբանի հետ իրենց համաձայնագիրը և նախընտրեցին առաջնորդվել դատարաններին, իրավապահ մարմիններին և հանրությանը ապակողմնորոշելու ճանապարհով:

Դատական վերջին նիստում Ն. Հարթունյանի ներկայությամբ իր փաստաբանը միջնորդեց գործի քննությունը հետաձգել` հաշտության համաձայնության նպատակով բանակցություններ վարելու պատճառաբանությամբ, ինչին իմ փաստաբանը չի առարկել: Նիստը հետաձգվելուց հետո հաշտության բանակցություններ վարելու փոխարեն Նարեկը դրսևորեց տրամագծորեն հակառակ վարքագիծ`թերթում իր հրապարակումներով վեճը տեղափոխեց նոր հարթություն: Ինչպես սա կարելի է որակել, դատեք ինքներդ:

Փաստաբան Ն. Հակոբյանի «պատասխան»-ով մեր կողմը ընդամենը փորձում էր բացատրել Ձեր խմբագրությանը և Ձեր ընթերցողներին, որ հարկավոր է զոհ չգնալ ապատեղեկատվությանը և սպասել, որ յուրաքանչյուր կողմի ներկայացրած փաստերն ու փաստաթղթերը քննվեն համապատասխան մարմինների կողմից և դրանից հետո միայն հանրության համար պարզ կլինի, թե ով է ճիշտ, ով սխալ:

Բնականաբար մեղավոր և անմեղ բառերն այստեղ չեմ օգտագործում, քանի որ սխալից և մեղքից զերծ կողմ չի լինում: Լինում են օրենք և իրավունք խախտող կամ չխախտող կողմեր:

Պարոն Բաղդասարյան, մեր հեռախոսազրույցի ժամանակ մեր միջև տեղի ունեցավ մոտավորապես հետևյալ երկխոսությունը: Ես ասացի. «Մենք հանրային գործիչներ ենք, և հանրությանը այսպիսի տհաճ վեճի մասնակից դարձնելով, Դուք ընդամենը հիասթափություն եք առաջացնելու հայ հասարակության մեջ»: Դուք պատասխանեցիք. «Բայց  Նարեկն ինձ թղթեր է ցույց տվել, ես փաստեր ունեմ»: Ես պատասխանեցի. «Եթե ես բերեմ բոլոր փաստերը, Ձեզ ապացուցող իմ անմեղ և Հարթունյանների հանցավոր լինելը, Դուք խոստանո՞ւմ եք, որ զերծ կմնաք այդ նյութը հրապարակելուց»: Դուք պարկեշտորեն պատասխանեցիք. «Ո՛չ, ես անպայման հրապարակելու եմ Նարեկի ասածներն ու ներկայացրած նյութերը...»:

Արդ, ես Ձեզ նորից կոչ եմ ուղղում, այս անգամ արդեն հրապարակավ, մի՛ ապակողմնորոշվեք և մի՛ փորձեք ապակողմնորոշել հայ հանրությանը: Կոչ եմ անում նաև Նարեկացի Արվեստի Միության հետ համագործակցող արվեստի գործիչներին և մտավորականներին, սպասեցե՛ք իրավապահ մարմինների եզրակացություններին, թերևս համոզվեք, որ ամեն ինչ այնպես չէ, ինչպես Ձեզ է մատուցվում:

Պարո՛ն Բաղդասարյան, այսքանից հետո, եթե Հարթունյանները շարունակեն Ձեր միջոցով կանոնավոր և կազմակերպված ձևով արատավորել իմ անունը, ընդ որում` առանց խնայելու իմ ընտանիքի և հասարակական գործչի վարկը, և այդ բոլորը ամենաանմակարդակ բամբասանքի վրա հիմնված անստուգելի և անհիմն ասեկոսներով, ապա ես համոզվելու եմ, որ Դուք ընդամենը հետապնդում եք ինձ վարկաբեկելու նպատակ: Իսկ դա շատ զարմանալի կլինի, քանի որ մեր Միության տարած ամենաթեժ պայքարներում Ձեր լրատվամիջոցը եղել է մեր ամենահետևողական աջակիցներից մեկը:

Եվ վերջում մի փոքր ակնարկ Հարթունյաններին. Ձեր մեծահարուստի սովորության համաձայն վարժ եք Ձեր դիմաց տեսնել Ձեր «մեծահոգի ողորմության» առջև խոնարհված և հաճոյացող մարդկանց: Ժամանակն է, որ հասկանաք` սա այդ դեպքը չէ, բազմաթիվ պատվավոր անհատներ, տարիներ շարունակ ամենամեծ զոհողություններով Ձեր համար Հայաստանում, և ոչ միայն Հայաստանում, ստեղծել են մեծամասշտաբ շահեր և ունեցվածք, զերծ են պահել Ձեզ շատ վնասներից, ստեղծել` Ձեր «բարեգործ»-ի անունը հայրենիքում, խնամել և հոգ են տարել  Ձեր ծեր և հիվանդ հորը...: Նրանց պետք է զատորոշել Ձեզ շրջապատող որոշ ձրիակեր հաճոյամոլներից և հասկանալ, որ մարդն իր արդար իրավունքը և ձեռք բերած ինքնասիրությունն երբեք չի զիջի շահագործողին:

Հարգանքներով՝

Սևակ Արծրունի

Հ.Գ.

Պարոն Արծրունի, եթե մեջբերում եք մեր հեռախոսային խոսակցությունը, լավ կլինի ամբողջությամբ դա անեք: Եթե Դուք կարծում եք, որ ես միայն Նարեկ Հարթունյանի հետ հանդիպելով եմ հոդված գրել, չարաչար սխալվում եք: Ես հանդիպումներ եւ զրույցներ եմ ունեցել այս գործին առնչվող տասնյակ մարդկանց հետ: Ձեր ստորագրություններով բազմաթիվ փաստաթղթեր կան իմ տրամադրության տակ, եւ դրանք ոչ մի կապ չունեն Ձեր հասարակական գործունեության հետ, դրանք կապ ունեն զանազան բիզնեսների հետ: Հասարակական գործունեությամբ զբաղվելու մասին Ձեր պնդումը բացարձակ անհիմն է, Դուք ավելի շատ գործարար եք, քան հասարակական գործիչ: Իսկ ի՞նչ է, եթե մարդը հասարակական գործունեությամբ է զբաղվում, նրան ամեն ինչ թույլատրելի՞ է: Եվ Հարթունյանները, եւ Դուք դիմել եք դատական մարմիններին, եւ այդ պահից սկսած` գործը հանրայնացվել է: Վաղը եթե այլ լրատվամիջոցներ էլ սկսեն լուսաբանել դատական այս գործընթացը, պիտի արգելվի՞: Ձեր եւ Հարթունյան ընտանիքի վեճը բավականին խճճված մի պատմություն է, որտեղ բազմաթիվ կապեր կան զանազան պաշտոնյաների եւ պետական կառույցների հետ: Չգիտեմ` դատարաններն ինչ որոշումներ կկայացնեն, բայց նույնիսկ հիմա ես, ինչպես մեր զրույցի ժամանակ ասացի, կրկնում եմ` գնացեք եւ հաշտվեք, եթե, իհարկե, անհանգստացած եք հասարակական կարծիքով եւ Ձեր հեղինակություններով: Այդ առումով այս պատմությունից Ձեզանից որեւէ մեկը չի կարող շահել:

Էդիկ Բաղդասարյան