Տեսանյութեր
Լուսանկարներ
Հրաժարվել կոմպլեմենտար քաղաքականություն վարելուց
Այսօր Ուրբաթ ակումբում ՀՅԴ Բյուրոյի Հայ դատի եւ քաղաքական հարցերի գրասենյակի ղեկավար Կիրո Մանոյանը ասաց, որ ԵԽԽՎ-ի գնահատականը անկախ ամեն ինչից սուբյեկտիվ է, քանի որ քաղաքական հաշվարկների վրա է հիմնված. «Եթե հիմնված լիներ Հայաստանի պարտավորությունների կատարման վրա, ապա մի շարք այլ երկրների նկատմամբ էլ պետք է կիրառվեր նման սանկցիա»:
Նա գտնում է, որ նման քայլը մեծ սխալ կլինի ԵԽԽՎ-ի կողմից: 1609 եւ 1620 բանաձեւերի կատարման տեսանկյունից էլ բանախոսը կարծում է, որ կարելի էր ավելին անել, բայց «թերացումը այնպիսին չէ, որ Հայաստանը զրկվի ձայնի իրավունքից»: Կ. Մանոյանը գտնում է, որ պետք երկրի ներքին կյանքում փոփոխություններ կատարել, բայց ոչ այն պատճառով, որ ԵԽԽՎ-ն է պահանջում, այլ` ելնելով ժողովրդական տրամադրություններից:
Հետքի հարցին, թե ինչ ազդեցություն կունենա ձայնի իրավունքից զրկելու փաստը արտաքին քաղաքականության վրա` Կ. Մանոյանը ասաց, որ ԵԽԽՎ-ի նման որոշումը ճնշումի միջոց է դառնալու Հայաստանի վրա. «Ոչ անպայման Հայաստանի ներսում փոփոխություններ կատարելու, այլ արտաքին քաղաքականության մեջ փոփոխություններ կատարելու համար»:
Հետքը հետաքրքրվեց, թե, ըստ Կ. Մանոյանի, ինչն է, որ այսօր ԵԽԽՎ-ին «ձեռք չի տալիս» Հայաստանի վարած արտաքին քաղաքականության առումով. «Շատ գոհ չեն, որ Հայաստանը կարողացավ օգոստոսյան պատերազմից հետո հավասարակշիռ կերպով դուրս գալ, ինչը Եվրոպայի առաջ դնում է պարտավորություն, որպեսզի Հայաստանին տրամադրեն այն աջակցությունը, որը հատկացնում են Վրաստանին, մյուս կողմից էլ փորձում են ճնշում բանեցնել Հայաստանի վրա, որ ավելի իրենց ազդեցության ենթակա քաղաքականություն վարի, քան վարում էր մինչեւ այսօր»:
Սակայն, ըստ բանախոսի, ԵԽԽՎ-ն հաշվի չի առնում, որ նման սանկցիաներ կիրառելով, Հայաստանին մղում է հրաժարվել կոմպլեմենտար արտաքին քաղաքականություն վարելուց:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել