ԼՂՀ կառավարության այսօր կայացած նիստում քննության էր ներկայացված գյուղատնտեսության կայուն զարգացման ռազմավարության, հացահատիկային մշակաբույսերի բերքատվության բարձրացման միջոցառումների ծրագրերը, որոնցում նախանշվում են գյուղատնետսության ոլորտի զարգացմանն ուղղված կատարվելիք միջոցառումներն ու անելիքները: Գործադիր իշխանության քննարկմանն էր ներկայացված նաեւ 2009-2013թթ. ԼՂՀ Հադրութի շրջանի Բանաձորի ենթաշրջանի համայնքներում գյուղատնտեսության զարգացման ծրագիրը: Ինչպես նախագիծը ներկայացնելու ժամանակ նշեց ԼՂՀ գյուղատնտեսության նախարար Արմո Ծատուրյանը, անցյալ տարի, երբ այցելեցին շրջան, ծանոթացան առկա վիճակին, որոշում կայացրեցին ենթաշրջանային զարգացման ծրագիր մշակել, եւ առաջինը ընտրվեց հենց Բանաձորի ենթաշրջանը: Շարունակելով թեման վարչապետ Արա Հարությունյանը նշեց, որ ենթաշրջանի զարգացման ծրագիրը չի սահմանափակվելու միայն գյուղատնտեսական ծրագրերով, այլ իրականացվելու են նաեւ սոցիալ-մշակութային զարգացմանն  ուղղված աշխատանքներ: Ենթաշրջանում կառուցվելու են նոր բնակելի տներ, դպրոցներ, բուժկետեր եւ այլն, ավելացրել է վարչապետը: Իսկ գյուղնախարարը ներկաներին տեղեկացրեց նաեւ, որ այժմ մշակման փուլում է Մարտակերտի շրջանի Մաղավուզի ենթաշրջանի զարգացման ծրագիրը: Վարչապետը նիստի վերջում անդրադարձավ նաեւ երեկ կատարված կադրային փոփոխություններին, մասնավորապես` փոխվարչապետի փոփոխությանը: Նա բարձր գնահատելով արդեն նախկին փոխվարչապետ Արմո Ծատուրյանի աշխատանքը, շեշտել է, որ փոփոխության հիմնական պատճառը 2009-2010թթ. նախատեսվող ֆինանսական դժվարին խնդիրները դիմակայելու անհրաժեշտությունն է`առավել ճիշտ ֆինանսական կառավարմամբ: Վարչապետը միաժամանակ ներկաներին հանձնարարեց, որ «ամեն մի դրամ ծախսելուց առաջ հիշեն, որ գտնվում ենք ֆորսմաժորային վիճակի նախաշեմին»: