Վերջերս ՀՀԿ պատգամավոր Ռաֆիկ Պետրոսյանը հայտարարել էր, որ «Ժառանգություն» խմբակցությունը բացի խանգարելուց ոչ մի օգուտ չի տալիս Ազգային Ժողովի նիստերին և ոչ կառուցողական քննադատությամբ է զբաղված. «Ժառանգություն» կուսակցության պատգամավոր Վարդան Խաչատրյանը Հետքի խնդրանքով արձագանքեց այդ հայտարությունը. ««Ժառանգություն» կուսակցությունն իրացնում է իր մանդատը պառլամենտում և այս տեսակետից որևէ մեկի գնահատականի կարիքը չունի, նա արտահայտում է ընդդիմադիր հատվածի շահերը: Ընդդիմադիր հատվածը խիստ զգալի է, իսկ եթե հաշվի առնենք այն հանգամանքը, որ հենց նույն կոալիցիայի լիդերներից որոշ անձինք հայտարարում են, որ 350 000-500 000 ձայն ավելացվել է պառլամենտական ընտրությունների ժամանակ, որի պատճառով պառլամենտի խճանկարն ընդհանրապես փոխվել է, դուք կարող եք սրանից ենթադրել թե այդպես խոսալու տեղ ով ունի և որքանով ունի, հիշենք, որ «Ժառանգություն» կուսակցությունը ընդդիմադիր զանգվածի միակ պառլամենտական ամբիոնն է, և եթե որոշ մարդիկ պատկերացնում են, որ պառլամենտում պետք է լինի միայն իշխանության բաղադրիչներ հանդիսացող քաղաքական ուժեր, ուրեմն մենք խոսում են այլմոլորակային ցիվիլիզացիայի մասին, համեմնայնդեպս երկրագնդի վրա եթե անգամ գոյություն ունեն նման տեսակետներ, ինչպես Ադրբեջանում, ապա չեն բարձրաձայնվում»: Ինչ վերաբերում է այն հարցին, իրենք վայր դնելու են մանդատները թե ոչ, Վ. Խաչատրյանն  ասաց, որ հունվարի վերջին սպասվող իրենց համագումարում կքննարկեն բոլոր արգումենտները և որոշում կկայացնեն: Բանախոսի կանխատեսմամբ` եթե իրենք վայր դնեն մանդատները, Ազգային ժողովը կդիմի Սահմանադրական դատարան, և քանի որ Սահմանդրական դատարանը որոշումներ է կայացնում ի օգուտ իշխանության, իսկ եթե այն պարունակում է իշխանության դեմ տարրեր, ապա այդ որոշումները չեն իրագործվում: Ըստ Խաչատրյանի Սահմանադրական դատարանի կողմից կլինի պարզ մեկնաբանություն, որ  չի կարող դրվել Ազգային Ժողովը ցրելու հարց և ծայրեհեղ դեպքում «Ժառանգություն» խմբակցության մանդատները կվերաբաշխվեն կոալիցիոն ուժերի մեջ ըստ, «այսպես ասած», ստացած ձայների թվի: