Տեսանյութեր
Լուսանկարներ
Մատաղիսի գործը ձգձգվում է
Երեկ Հյուսիսային քրեական դատարանում շարունակվեց Մատաղիսի գործի քննությունը: Հիշեցնենք, որ ժամկետային զինծառայողներ 23-ամյա Արայիկ Զալյանը, Մուսա Սերոբյանը և Ռազմիկ Սարգսյանը մեղադրվում են Լեռնային Ղարաբաղի Մատաղիս գյուղի զորամասի զինծառայողներ Ռոման Եղիազարյանի և Հովսեփ Մկրտումյանի սպանության մեջ:
Այս անգամ ևս ամբաստանյալների շահերի պաշտպան Ստեփան Ոսկանյանը չէր ներկայացել դատարան, սակայն նախագահող դատավոր Հարություն Մովսիսյանը որոշեց դատավարությունն անցկացնել առանց նրա ներկայության: Դատավարության սկսվելուն պես ամբաստանյալ Արայիկ Զալյանը մյուս երկու ամբաստանյալների` Մուսա Սերոբյանի և Ռազիկ Սարգսյանի անունից միջնորդություն ներկայացրեց` քրգործը կարճելու վերաբերյալ, քանի որ, ըստ նրա, ընթացող դատաքննությունը խախտում է արդար դատաքննության իր իրավունքը, իսկ որպես հիմք ընդունել էր Սահմանադրական դատարանի այն մեկնաբանությունը, որ գործը լրացուցիչ նախաքննության ուղարկելով` դատարանը դուրս է գալիս դատավարությունում անկողմնակալ իր դերի շրջանակներից և իրականացնում է արդարադատության գործառույթի հետ անհամատեղելի գործողություններ:
Այսինքն` Սահմանադրական դատարանն արդեն իսկ արձանագրել է, որ լրացուցիչ` երկրորդ նախաքննության առկայութունը անհամատեղելի է մարդու իրավունքների և հիմնարար ազատությունների պաշտպանության մասին Եվրոպական կոնվենցիայով երաշխավորված արդար դատաքննության իրավունքի հետ, ուստիև Հյուսիսային քրեական դատարանը, անվավեր ու հակասահմանադրական ճանաչված օրենքի դրույթների կիրառմամբ, խախտում է արդար դատաքննության իրավունքը:
Ընդմիջում հայտարարելուց ու երկու ժամ շարունակ խորհրդակցելուց հետո դատարանը որոշեց մերժել միջնորդությունը: Դատը հետաձգվեց մինչև փետրվարի 6-ը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել