Տեսանյութեր
Լուսանկարներ
Սահմանադրությամբ ամրագրված սահմանները կնշվեն քարոզչական նյութերում
Օրերս ԼՂՀ կառավարության հրավերով Ղարաբաղ են հրավիրվել ՀՀ զբոսաշրջության ոլորտի պատասխանատուներ, արտգործնախարարության համապատասխան բաժինների ներկայացուցիչներ` էկոենոմիկայի նախարարության զբոսաշրջության եւ տարածքային տնտեսական զարգացման բաժնի պետ Մեխակ Ապրեսայի գլխավորությամբ:
Նրանք ԼՂՀ կառավարությանն առընթեր զբոսաշրջության վարչության ներկայացուցիչների հետ քննարկել են զբոսաշրջության զարգացման հետ կապված հարցերն ու անելիքները, համագործակցության հեռանկարները: Իսկ այսօր վարչության պետ Սերգեյ Շահվերդյանը եւ Հայաստանից ժամանած հյուրերը մամուլի ասուլիս են հրավիրել:
Ինչպես իր խոսքում նշել է Սերգեյ Շահվերդյանը, 2008 թվականին բավականին լուրջ խնդիրներ են ունեցել միջազգային զբոսաշրջային ցուցահանդեսներում Ղարաբաղի մասնակցության ապահովման առումով, ինչի արդյունքում Ղարաբաղը չկարողացավ մասնակցել որեւէ նման ցուցահանդեսի:
ՀՀ էկոնոմիկայի նախարարության զբոսաշրջության եւ տարածքային տնտեսական զարգացման բաժնի պետ Մեխակ Ապրեսայի խոսքերով, իրենց խնդիրներից է «Ղարաբաղի զբոսաշրջային արդյունքը Հայաստանի արդյունքի հետ ներկայացնել միջազգային շուկայում` գովազդատեղեկատվական նյութերում, հեղինակավոր հեռուստաալիքներում, էլեկտրոնային մարկետինգի բնագավառում եւ այլն»:
«Հանդիպման ընթացքում քննարկվել է միջազգային ցուցահանդեսներին Լեռնային Ղարաբաղի մասնակցության հարցը` ինչպես Հայաստանի հետ մեկ տաղավարի ներքո, այնպես էլ առանձին տաղավարով: Այս ամենը ՀՀ եւ ԼՂՀ արտգործնախարարությունների հետ համատեղ պետք է քննարկել, ինչպես նաեւ դիվանագիտական ուղիներով պետք է քննարկումներ կազմակերպենք նաեւ միջազգային ցուցահանդեսների կազմակերպիչների հետ եւ փորձենք հասնել ցանկալի արդյունքի»,-ավելացրել է Մեխակ Ապրեսյանը:
Հանդիպման հարցերի մի խմբաքանակ էլ, ըստ Սերգեյ Շահվերդյանի, վերաբերում էր ՀՀ զբոսաշրջային քարոզչության նյութերում ԼՂՀ-ի ներգրավմանը:
«Լուրջ քննարկման առարկա է դարձել նաեւ մեզ շատ հուզող ԼՂՀ քարտեզի սահմանների հարցը: Պետք է ասեմ, որ այստեղ եւս փոխըմբռնում եղավ այն հարցի շուրջ, որ ԼՂՀ-ն ունի Սահմանադրությամբ ամրագրված սահմաններ եւ հենց դրանք պետք է փորձենք նշել բոլոր քարոզչության նյութերում: Իհարկե սա միայն այստեղ հավաքվածների խնդիրը չէ, այլ կարիք ունի երկու հանրապետությունների ղեկավարության քննարկման: Վստահ եմ, որ այս հարցը եւս կլուծվի»,-ավելացրել է պարոն Շահվերդյանը:
Նշվեց նաեւ, որ Ղարաբաղն արդեն իսկ ներգրավված է Հայաստանի զբոսաշրջային գովազդատեղեկատվական նյութերում. համաշխարհային հեղինակություն վայելող 2 ամսագրերում արդեն Ղարաբաղը ներկայացված է Հայաստանի հետ:
«Ղարաբաղը ներկայացված է նաեւ Հայաստանը ներկայացնող մեկ ժամ տեւողությամբ վավերագրական ֆիլմում, ինչը շուտով պատրաստ կլինի եւ մեր կողմից ընդունվելուց հետո հնարավորություն կլինի նաեւ ներկայացնելու հանրության դատին»,-տեղեկացրել է Մեխակ Ապրեսյանը: Նրա հավաստմամբ, ֆիլմը պատրաստ լինելուց հետո կհեռարձակվի մի շարք հեռուստաալիքներով:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել