![](/static/articles/34/60/l-e3wPis8y6D.jpg)
«Առավոտ». վարչապետը պատմեց իր ընտանիքի մասին
Հայաստանի վարչապետ Տիգրան Սարգսյանը Facebook-ի իր էջում անդրադարձել է մամուլում տարածված այն տեղեկություններին, որ իր կինն ու երեխաները Հայաստանի քաղաքացիներ չեն:
Վարչապետը տեղեկացնում է, որ իր ընտանիքի բոլոր անդամները՝ կինը և երեք երեխաները, ունեն ՀՀ քաղաքացիություն: «Այլ կերպ լինել չէր էլ կարող: Մեր օրենսդրության համաձայն՝ երեխան, ում ծնողները ՀՀ քաղաքացիներ են, ձեռք է բերում ՀՀ քաղաքացիություն»,- նշել է նա:
Տիգրան Սարգսյանի դուստրը ծնվել է 1985-ին Երևանում: Հետագայում երկար տարիներ բնակվել է Իսպանիայում, որտեղ նրա կինը ռուսաց լեզու էր դասավանդում իսպանական առաջատար համալսարաններից մեկում: Կնոջ աշխատանքային պայմանագրի ավարտից հետո նրանք վերադարձել են Երևան:
Աղջիկը սովորել է հայկական դպրոցում, ամուսնացել է, ամուսնու հետ երեք տարի ապրել է Մոսկվայում, որտեղ ամուսինը սովորում էր ասպիրանտուրայում: Թեկնածուական ատենախոսության պաշտպանությունից հետո նրանք մշտական բնակության են վերադարձել Երևան: Երկու տարի առաջ վարչապետին թոռնուհի են նվիրել:
Տ.Սարգսյանի որդիները՝ Աբգարն ու Մարկոսը, ծնվել են Իսպանիայում: Հայաստան վերադառնալուց հետո Աբգարը Երևանում դպրոց է գնում, իսկ Մարկոսը հաճախում է մանկապարտեզ:
Վարչապետ Տիգրան Սարգսյանը պատմել է նաև, թե ինչպես է ծանոթացել իր կնոջ հետ: Նրանք ծանոթացել են Լենինգրադում ուսանելու տարիներին: Նրա կինն այսօր Հայաստանում զբաղվում է երեխաներով, որպեսզի որդիները ստանան հայեցի դաստիարակություն, հաճախեն հայկական դպրոց:
Լուսանկարը՝ tigransargsyan.am կայքից
Մեկնաբանություններ (3)
Մեկնաբանել