Եվրախորհրդի Խորհրդարանական վեհաժողովի (ԵԽԽՎ) լիագումար նիստում այսօր քվեարկության դրվեց Հայաստանի կողմից Վեհաժողովի 1609 եւ 1620 բանաձեւերի պահանջների կատարման հարցը: Քվեարկության դրված նախագծում, մասնավորապես, առաջարկվել էր փոփոխություն մտցնել Փարիզում անցած տարվա դեկտեմբերի 17-ին ԵԽԽՎ-ի Մոնիտորինգի հանձնաժողովի հավանությանը արժանացած բանաձեւի նախագծի 5-րդ կետը փոխելու մասին: Ինչպես տեղեկացնում է "Ազատություն" ռադիոկայանը, այստեղ տեղ գտած ձեւակերպումը, որտեղ նշվում էր, որ անձինք, "ովքեր մեղադրվում են Քրեական օրենսգրքի 225-3 եւ 300 հոդվածներով, ինչպես նաեւ անձինք, ում դեմ մեղադրանք է առաջադրվել միայն ոստիկանների ցուցմունքների հիման վրա, մեղադրվել են քաղաքական շարժառիթներով", եւ արձանագրվում էր, որ նմանօրինակ մեղադրանքներով դատապարտված անձինք կարող են համարվել քաղբանտարկյալներ", փոփոխության ենթարկվեց: Առաջարկված փոփոխությամբ նշվել է, որ հիշյալ անձինք "կարող էին մեղադրված լինել քաղաքական շարժառիթներով": Տեքստից ընդհանրապես հանվել է նաեւ "քաղբանտարկյալներին" վերաբերող հատվածը: Կայացած քվեարկության արդյունքում 141 կողմ, 3 դեմ, 5 ձեռնպահ ձայներով բանաձեւն ընդունվեց առանց Հայաստանի պատվիրակության ձայնի իրավունքի կասեցման մասին դրույթի: