Համաշխարհային տնտեսական ճգնաժամի հետեւանքով ժամանակավորապես դադարել են աշխատել Գյումրիի մի քանի գործարաններ, հատկապես նրանք, որոնց սպառողական շուկան Ռուսաստանն է: Շիրակի մարզպետարանի մեր աղբյուրի տեղեկացմամբ` այս պահի դրությամբ դադարեցվել են ռուսական «Բիզնես կենտրոնին» պատկանող «Քարհատ մեքենա» գործարանի աշխատանքները, աշխատակիցներին մինչև մարտ ամիսը հարկադիր պարապուրդի են ուղարկել: Վերջինիս հումքը` քարի մշակման հաստոցները, իրացվում էր Ռուսաստանում, իսկ այժմ գրեթե պահանջարկ չկա: Նույն վիճակում է հայտնվել նաև Գյումրիի «Անալիտիկ սարքերի» գործարանը, որի շուկան ևս Ռուսաստանն է: Այս մասին գործարանների տնօրենները առայժմ խուսափում են լրագրողներին պարզաբանումներ տալ` «խուճապ չստեղծելու» պատրվակով: Հիշեցնենք, որ սրանք Խորհրդային Միության տարիներից մնացած եզակի կառույցներ են, որոնք ոչ միայն չեն թալանվել, այլև մինչև վերջերս գյումրեցիների համար աշխատատեղ են ապահովել: