Տեսանյութեր
Լուսանկարներ
Հովիկ Աբրահամյանը պարգեւատրեց բարձրաստիճան սպաների
Այսօր ԱԺ նախագահ Հովիկ Աբրահամյանը Բանակի օրվա առթիվ Ազգային ժողովում մի խումբ բարձրաստիճան սպաների պարգեւատրեց ԱԺ պատվո մեդալներով եւ շնորհակալագրերով: Արարողությանը ներկա էին պաշտպանության նախարար Սեյրան Օհանյանը, պատգամավորներ, պաշտպանության նախարարության բարձրաստիճան սպաներ:
Երկրի պաշտպանունակության մակարդակի բարձրացման, զինված ուժերի բարեփոխումների գործընթացին ակտիվ մասնակցության համար բանակի 17-ամյակի առթիվ ՀՀ ԱԺ պատվո մեդալներով պարգեւատրվեցին ՀՀ պաշտպանության նախարար Սեյրան Օհանյանը, ՀՀ ԶՈՒ Շ պետ, պաշտպանության նախարարի առաջին տեղակալ, գեներալ-լեյտենանտ Յուրի Խաչատուրովը, պաշտպանության նախարարի տեղակալ, գեներալ-լեյտենանտ Ալիկ Միրզաբեկյանը, պաշտպանության նախարարի տեղակալ Արա Նազարյանը եւ ՊՆ իրավաբանական վարչության պետ, գնդապետ Սեդրակ Սեդրակյանը: Ծառայողական պարտականությունները բարեխիղճ եւ անբասիր կատարելու համար շնորհակալագրերով պարգեւատրվեցին ՀՀ ԶՈՒ անձնակազմի հետ տարվող աշխատանքների վարչության պետ, գեներալ-մայոր Վարդան Ավետիսյանը եւ ՀՀ ՊՆ խաղաղապահ ուժերի բրիգադի հրամանատար, գնդապետ Արթուր Սիմոնյանը:
Ողջունելով ներկաներին` ԱԺ նախագահ Հովիկ Աբրահամյանն ասաց.
«Հայաստանը թեեւ առաջնորդվում է հակամարտությունների խաղաղ կարգավորման, խաղաղության եւ կայունության ամրապնդման սկզբունքով, սակայն ազգային բանակը միշտ պետք է պատրաստ լինի չեզոքացնելու հնարավոր արտաքին վտանգները եւ պաշտպանելու մեր նախնիների ավանդած ազգային արժեքները»:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել