Բանակի հիմնադրման 17 ամյակին նվիրված  երիտասարդների կողմից իրականացվող միջոցառումները եզրափակվեցին  դեպի Եռաբլուր բազմահազարանոց երթով: «Ամեն ինչ փոխկապակցված է, մենք սկսեցինք Հաղթանակի կամուրջից և բնականաբար պետք է ավարտեինք Եռաբլուրում, որտեղ ամփոփված են այն մարդկանց շիրիմները, ովքեր կռվել են մեր ազգի համար և ում կյանքի և արյան գնով մենք այսօր ունենք տարածաշրջանի ամենահզոր ու մարտունակ բանակը»,- ասաց «Հայոց բանակը 17 տարեկան է» ծրագրի նախաձեռնող անդամ Կարապետ Թոռչյանը: Երիտասարդները եկել էին Հայաստանի ամենատարբեր մարզերից և բնակավայրերից: «Ես հպարտ եմ, որ մեր բանակը չնայած 17 տարեկան է, բայց արդեն վառ անցյալ ունի, բոլոր երկրներն էլ ունեն բանակ, բայց ոչ բոլոր երկրներն ունեն հաղթանակած բանակ»,- ասաց Կարեն Գրիգորյանը, ով ընկերների հետ եկել էր Եղեգնաձորից Եռաբլուր այցելելու համար: Երիտասարդները ծաղիկներ դրեցին հերոսների շիրիմներին,  խունկ վառեցին, երգեցին հայրենասիրական երգեր:  Երիտասարդներին էին միացել նաև ազատամարտիկների մայրեր և երեխաներ: «Այսօր, որ ես ոտքի կանգնած եմ, դա իմ ազգի լավագույն երիտասարդների շնորհիվ է: Ես մեծ հույսեր ունեմ, որ գալիք հաղթանակները մեր սերնդինն են լինելու: Այսօր էլ ունենք հերոսներ, երիտասարդներ, որոնք դաստիարակվում են հայրենասիրությամբ և մեր հողի վաղվա հաստատուն պահպաններն են, Եռաբլուր հաճախող և իրենց ավագ եղբայրներին իրենց հաղթանակների մասին զեկուցող: Զորամաս Եռաբլուրը երբեք գերեզման չէ:Եթե ազգը պահանջի, բոլորն էլ ոտքի  կկանգնեն, ես կորցրել եմ իմ որդուն, և պաշտում եմ այն երիտասարդին, որի համար միայն հայրենիքն է սուրբ: Հայ ժողովրդի կորցրած հողերը հայ երիտասարդը տուն կբերի»,- մեզ հետ կիսվեց Դուշման Վարդանի մայրը`տիկին Զարիկը: Ավարտելով երթը` երիտասարդները հույս հատնեցին, որ այսօր մարդիկ դեռ կշարունակեն տոնել մեր բանակի ծննդյան օրը և երեկոյան սեղանի շուրջ բաժակ կբարձրացնեն ու կխմեմ հանուն մեր անվտանգ ու խաղաղ ապագայի: