Տեսանյութեր
Լուսանկարներ
ՀԱՊԿ-ի նիստը վարել է Սերժ Սարգսյանը
Մոսկվայում այսօր տեղի է ունեցել Հավաքական անվտանգության պայամանագրի կազմակերպության (ՀԱՊԿ) Կոլեկտիվ անվտանգության խորհրդի արտահերթ նիստը, որը վարել է Կազմակերպությունում նախագահող երկրի` Հայաստանի Հանրապետության Նախագահ Սերժ Սարգսյանը:
Ինչպես հաղորդում է Նախագահի մամլո գրասենյակը՝ ՀԱՊԿ պետությունների ղեկավարների նեղ կազմով բանակցությունները շարունակվել են ընդլայնված կազմով` Ազգային անվտանգության խորհրդի քարտուղարների, արտաքին գործերի եւ պաշտպանության նախարարների մասնակցությամբ:
Դեկտեմբերին Ղազախստանում` Վորովոյում տեղի ունեցած ՀԱՊԿ ոչ պաշտոնական գագաթնաժողովում ձեռք բերված պայամանավորվածության համաձայն պետությունների ղեկավարները մոսկովյան նիստի ընթացքում քննարկել եւ ստորագրել են ՀԱՊԿ-ի արագ արձագանքման կոլեկտիվ ուժեր ստեղծելու վերաբերյալ որոշումը:
Ներկայացնելով կայացված որոշումը` Հայաստանի Հանրապետության Նախագահ Սերժ Սարգսյանն այն բնութագրել է որպես կարեւոր քայլ`«ուղղված կազմակերպության ռազմական բաղադրիչի ուժեղացմանը»: Ընդունված որոշումը պայմանավորված է անդամ երկրների կոլեկտիվ անվտանգության ամրապնդման եւ դրա պոտենցիալի հետագա բարձրացման, ինչպես նաեւ ռազմական ագրեսիայի պարագայում համատեղ մասնակցությամբ հետ մղելու եւ այլ մարտահրավերների անհրաժեշտությամբ:
ՀԱՊԿ-ի գլխավոր քարտուղարին եւ Կազմակերպության միացյալ շտաբին հանձնարարվել է եռամսյա ժամկետում մշակել եւ կանոնադրական մարմիններին ներկայացնել արագ արձագանքման կոլեկտիվ ուժերի ստեղծման վերաբերյալ որոշումից բխող նորմատիվ իրավական ակտերի փաթեթ:
Ստորագրված որոշման համաձայն, ՀԱՊԿ-ի արագ արձագանքման կոլեկտիվ ուժերի կիրառման մասին որոշում կայացվում է Կազմակերպության կոլեկտիվ անվտանգության խորհրդի կողմից կոնսենսուսի սկզբունքով:
Մեկ այլ կետով նախատեսվում է, որ ՀԱՊԿ-ի արագ արձագանքման կոլեկտիվ ուժերի կազմում գործող` անդամ երկրների կողմից տրամադրված զինուժը, մինչ իրենց վերապահված հավաքական առաքելությանն անցնելը, •տնվում են տվյալ երկրների բացառիկ իրավազորության ներքո` իրենց մշտական տեղակայման վայրերում:
Արտահերթ նիստում քննարկվել եւ որոշում է ընդունվել նաեւ Կազմակերպության հաջորդ նիստի անցկացման տեղի եւ ժամկետի վերաբերյալ, ըստ որի Կոլեկտիվ անվտանգության խորհրդի հաջորդ նիստը տեղի կունենա 2009թ-ի հունիսին Մոսկվայում: Նիստում հաստատվել է նաեւ կազմակերպության 2009թ-ի բյուջեն:
Կոլեկտիվ անվտանագության խորհրդի արտահերթ նիստում Նիկոլայ Բորդյուժան վերահաստատվել է ՀԱՊԿ-ի գլխավոր քարտուղարի պաշտոնում:
ՀԱՊԿ-ի կոլեկտիվ անվտան•ության խորհրդի արտահերթ նիստին հաջորդած աշխատանքային ճաշից հետո, երկրների ղեկավարները մասնակցել են Եվրասիական տնտեսական ընկերակցության Միջպետական խորհրդի արտահերթ նիստին, որտեղ քննարկվել է համատեղ հակաճգնաժամային հիմնադրամ եւ բարձր տեխնոլոգիաների կենտրոն ստեղծելու վերաբերյալ հարցեր:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել