Հիմնական խախտումներն աշխատավարձի եւ վերջնահաշվարկի մասով են
2008 թվականի ընթացքում ԼՂՀ սոցապահովության նախարարության աշխատանքի պետական տեսչության կողմից ստուգումներ են իրականացվել հանրապետության պետական եւ ոչ պետական մի շարք հիմնարկներում: Արդյունքում 16 վարչական տույժ է նշանակվել` շուրջ 1մլն 470 հազար դրամի չափով: Ամենամեծ տուգանքի չափը եղել է 420 հազար դրամ, որի պատճառն աշխատավարձի ուշացումն է:
Հետքի հետ զրույցի ժամանակ տեսչության պետ Կարեն Թովմասյանը տեղեկացրել է, որ հիմնական խախտումները կապված են հենց աշխատավարձերի ուշացման, աշխատանքից ազատվելու դեպքում վերջնահաշվարկի չտրամադրման հետ:
Տեսչության 2008 թվականի գործունեության ընթացքում շեշտը հիմնականում դրվել է ուսումնասիրությունների եւ մեթոդական օգնության ցուցաբերման վրա, սակայն ինչպես խոստովանում է տեսչության պետը, նրանց նպատակը միայն դա չէ, այլ որպես վերահսկողություն իրականացնող մարմին, պետք է նաեւ ստուգումներ իրականացնեն: Այս տարի, ըստ ծրագրի, նախատեսվում է ստուգումներ իրականացնել հանրապետության 70 պետական եւ ոչ պետական հիմնարկներում:
Բացի ծրագրով նախատեսված ստուգումներից, տեսչության տեսուչներն անհրաժեշտության դեպքում ստուգումներ են իրականացնում նաեւ բնակիչների դիմումների հիման վրա, որոնց թիվը, Կարեն Թովմասյանի հավաստմամբ, գնալով աճում է:
«Դիմումները մեծամասամբ վերաբերում են վերջնահաշվարկի չտրամադրմանը»,-մեր զրույցի ժամանակ նշել է տեսչության պետը, որի խոսքերով, դիմում են հիմնականում աշխատանքից ազատվածները:
Աշխատողների կողմից դիմումներ հիմնականում չեն լինում, ինչը Կ.Թովմասյանի կարծիքով, աստիճանաբար կփոխվի: Իսկ դրա համար, ըստ նրա, անհրաժեշտ է կառույցի նկատմամբ ժողովրդի վստահությունը, ինչի ուղղությամբ բավականին աշխատանք է տարվում, որոնց թվին կարելի է դասել անցած տարվա ընթացքում հանրապետության շրջկենտրոններում եւ մայրաքաղաքում անցկացված սեմինարները:
Վստահության ձեւավորման վառ ապացույցը թերեւս դիմումների աճն է: Օրինակ այս տարվա առաջին ամսում արդեն 5 դիմում է ստացվել:
Տեսչության պետի հավելմամբ, ոչ պետական հիմնարկներում լինում են նաեւ խախտումներ` կապված նվազագույն աշխատավարձի ապահովման հետ, որոնց եւս փորձում են երեւան հանել եւ համապատասխան քայլեր ձեռնարկել:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել