«Հայաստանին տրամադրելով կես միլիարդ դոլար վարկ` Ռուսաստանն ինչ քաղաքական պահանջ է ներկայացնելու» հարցին խորհրդարանական ճեպազրույցների ժամանակ պատասխանեցին  խմբակցությունների ներկայացուցիչները: «Ժառանգություն» խմբակցության ղեկավար Արմեն Մարտիրոսյանը գտնում է, որ ճգնաժամի պայմաններում «ոչ ոք ոչ մեկին հենց այնպես փող չի տա», իսկ թե  ինչ պայմաններ կարող է Ռուսաստանը ներկայացրած լինել Հայաստանին, Արմեն Մարիտրոսյանը չգիտի, քանի որ վարկի տրամադրման մասին տեղեկատվությունը սուղ է: «Օրինաց երկիր» խմբակցության ղեկավար Հեղինե Բիշարյանն էլ տրամաբանում է. «Տրամաբանորեն է, եթե ստացել ես գումար վարկ, ապա գումար էլ պետք է վերադարձնես»: ՀՅԴ խմբակցության ներկայացուցիչ, ԱԺ փոխնախագահ Հրայր Կարապետյանն էլ կարծում է. «Հայաստանը վարկի դիմաց չի ստանձնել քաղաքական պարտավորություններ, քանի որ  վարկը հայ-ռուսական հարաբերությունների տրամաբանության մեջ է»: ԲՀԿ խմբակցության քարտուղար Արամ Սաֆարյանն էլ համակարծիք է: ՀՀԿ խմբակցության ղեկավար Գալուստ Սահակյանն էլ գտնում է, որ  «քաղաքական պահանջների մասին խոսք չկա, քանի որ ստացածը վարկ է, որը պետք է հետ վերադարձնել»: