«Խոսրովի անտառ» պետական արգելոցի Կաքավաբերդի տեղամասի պետ Գոռ Հովհաննիսյանն ազատվել է աշխատանքից պաշտոնական դիրքի չարաշահման և պետական արգելոցի ռեժիմի կոպիտ խախտում թույլ տալու, առանց պատշաճ թույլտվության արգելոցում վայրի խոզ սպանելու համար: Այս մասին տեղեկացնում է Բնապահպանության նախարարության մամլո ծառայությունը։ Փետրվարի 6-ին Հանրային հեռուստաընկերության «Հայլուր» լրատվական ծրագիրը հաղորդել էր «Խոսրովի  անտառ» պետական արգելոցում տեղի ունեցած ապօրինի որսի մասին: Փաստի վերաբերյալ հաջորդը օրը բնապահպանության նախարար Արամ Հարությունյանի մոտ տեղի է ունեցել խորհրդակցություն, որի ընթացքում ոլորտի պատասխանատուներին տրվել են հանձնարարականներ` պարզելու համար տեղի ունեցածի մանրամասները: Բնապահպանական տեսչության կողմից հաշվարկվել է կենդանական աշխարհին պատճառված վնասի հատուցում 1 մլն դրամ գումարի չափով, որը վերականգնելու է Գոռ Հովհաննիսյանը։ Իսկ Կաքավաբերդի տեղամասի 4 աշխատակիցների հայտարարվել է խիստ նկատողություն, մեկ աշխատակցի` նկատողություն՝ նշված օրինախախտման դեմ համապատասխան միջոցառումներ չիրականացելու, արգելոցի ղեկավարությանը ժամանակին չտեղեկացնելու համար։ Գործի վերաբերյալ նյութերը ուղարկել է Արարատի մարզային դատախազություն հետագա ընթացք տալու համար: