Հովհաննես Թումանյանի հայտնի թիֆլիսյան «Վերնատունը» 25 հազար ԱՄՆ դոլարով վաճառվել է վրացի մի բիզնեսմենի: Այս մասին հայտնում է «Ռեգնում» գործակալությունը` վկայակոչելով նաև Հայաստանի գրողների միության նախագահ Լևոն Անանյանին, որը հաստատել է վաճառքի մասին ինֆորմացիան: Վերջինս ասել է, որ «Վերնատան» հնարավոր մասնավորեցման մասին տեղեկություններ հայտնի են եղել դեռ 4-5 տարի առաջ, ընդ որում` այն ժամանակ շինությունը դրված է եղել վաճառքի 15 հազար ամերիկյան դոլարով: Անանյանը նաև ասել է, որ այդ ժամանակ ինքը դիմել է ՀՀ կառավարությանը «Վերնատունը» գնելու խնդրանքով, սակայն «այդ հարցում հետևողականություն չի ցուցաբերվել»: Այնուամենայնիվ, ՀԳՄ նախագահը հույս է ունիլ, որ հարցը կլուծվի Հայաստանի և Վրաստանի կառավարությունների ջանքերով: «Դա բացառիկ լավ իրադարձություն կլիներ մեծ դասականի 140-ամյակի կապակցությամբ»,- հավելել է ՀԳՄ նախագահը: «Դա նոր չէ վաճառվել, արդեն մոտ 10 տարվա պատմություն ունի, վաճառվել է այն գրադարանը, որը Թումանյանի անվան էր: Հիմա գրադարանները կենտրոնացվում են»,-Հետքի հետ զրույցում նշեց Թբիլիսիի Պ. Ադամյանի անվ. թատրոնի ղեկավար,  Թբիլիսիի խորհրդարանի պատգամավոր Արմեն Բայանդուրյանը: Արմեն Բայանդուրյանը չգիտեր, թե ում է վաճառվել, բայց փաստեց, որ վաճառվել է միայն «Վերնատան» գրադարանը, իսկ մյուս մասին վերաբերող տեղեկատվություն, որտեղ դեռ ապրում է Թումանյանի թոռը, պատգամավորը չուներ: Հայաստանի գրողների միության քարտուղար Հովհաննես Գրիգորյանն էլ ասաց, որ «Վերնատան» գրադարանը հիմա է վաճառվել, մոտ 10-15 օրվա պատմություն ունի, և զարմացավ վաճառքի 10 տարվա վաղեմության փաստից: «Նախկինում այն գտնվում էր Թբիլիսիի քաղաքապետարանի հսկողության ներքո` ժառանգների ցանկությամբ, դա թանգարանային արժեք ունի, գտնվում է պետության հովանավորության տակ, դա անպայման ներսից ինչ-որ մեկի հետ արած կլինեն»,- հավելեց  Հովհաննես Գրիգորյանը: «Վերնատունը» հիմնել էր Հովհաննես Թումանյանը 1899թ.-ին: Այն 19րդ դարի վերջի, 20րդ դարի սկզբի հայ գրական ակումբ-խմբավորում էր, որի հանդիպումները տեղի էին ունենում Թումանյանի բնակարանում՝ Թիֆլիսի Բեհրության փողոց № 44 տան ամենավերին՝ չորորդ հարկում (վերնատանը): Վերնատան մշտական անդամները շաբաթը մեկ-երկու անգամ հավաքվում էին Հովհաննես Թումանյանի տանը՝ իրար տեսնելու, զրույց անելու։ Այս հանդիպումների ընթացքում մեծ գրողները ընթերցում ու քննարկում էին համաշխարհային գրականության դասական և նոր հեղինակների գործերը, ինչպես նաև իրենց գործերն էին ներկայացնում ընդհանուր քննադատման։ Վերնատան մշտական անդամներն էին`Ղազարոս Աղայանը, Հովհաննես Թումանյանը, Ավետիք Իսահակյանը, Լևոն Շանթը, Դերենիկ Դեմիրճյանը, Նիկոլ Աղբալյանը: Մշտական անդամներից բացի, Վերնատան հանդիպումներին ներկա են եղել նաև այլ բազում հայ գրողներ, արվեստագետներ, պատմաբաններ, լեզվաբաններ կամ գրականասեր մարդիկ՝ Պ. Պռոշյանը, Մուրացանը, Վ. Փափազյանը, Կոմիտասը, նկարիչներ՝ Գ. Բաշինջաղյանը, Փ. Թերլեմեզյանը և այլք։