Ճյուղային նախարարություններն ընդդիմանում են Ֆինանսների նախարարությունը չորս չլուծված խնդիր ունի` լիցենզավորման եւ թույլտվությունների ընթացակարգերի պարզեցում, "Doing business" ծրագրի պարտավորությունների կատարում, Մաքսային ծառայությունում պահանջվող փաստաթղթերի քանակի կրճատում եւ գնումների նոր հայեցակարգի ներդրում: Այսօր կառավարությունում հաշվետվությամբ հանդես եկավ Ֆինանսների նախարար Տիգրան Դավթյանը: Ընդունված կարգով` նա անդրադարձավ միայն բացթողումներին: Ամենաթույլ կողմը նախարարը համարեց "Doing business" ծրագիրը. «Խնդիրն այստեղ այն է, որ Ֆինանսների նախարարությունը համարվում է համակարգող նախարարություն, իսկ կատարողները ճյուղային նախարարություններն են, որոնցից ստանում ենք պատասխաններ, թե ընթացակարգերի պարզեցման խնդիր չկա»: Նախարարությունն առաջարկել է երկրորդ փուլի քննարկումներ իրականացնել: Վարչապետ Տիգրան Սարգսյանն ասաց, թե այդ բնագավառում ունեն լուրջ պրոբլեմ. «Միջազգային համադրումները ցույց են տալիս, որ բյուրոկրատական քաշքշուկները մեզ մոտ ձեւավորվել են օրենսդրությունից եւ պրակտիկայից ելնելով»: Վարչապետը համաձայն է, որ կա ներքին դիմադրողականություն, քանի որ որոշ գերատեսչություններ պետք է փոխեն իրենց վարքագիծը. «Ադրբեջանը ցույց տվեց, որ ծրագրի շրջանակներում կարելի է մեկ տարում բոլոր ընթացակարգերի կտրուկ բարելավում արձանագրել, ինչու մենք չենք կարող»: Ըստ կառավարության ղեկավարի` ծրագրի շուրջ քննարկումներն արդեն երկու տարի է ծավալվել են, սակայն արված գործ չկա: Նախարարն էլ լրացուցիչ ջանքերի կարիք ունի: Վարչապետը խորհուրդ տվեց հարցն անձնական հսկողության տակ պահել: Տ. Սարգսյանը մատնանշեց էլեկտրոնային գնումների համակարգ ներդնելու ծրագիրը, որը եւս իրականացված չէ եւ հարցրեց, թե որն է վերջնաժամկետը: «Հայեցակարգով մենք փորձում ենք դա փուլային անել, որոշակի տարրեր արդեն ներդրված են, բայց քանի որ Համաշխարհային բանկի հետ է կապված, ուստի հիմնական բեռը կդնենք 2010 թվականի վրա»,- ասաց նախարար Դավթյանը: Վարչապետն անդրադարձավ երրորդ չկատարված ծրագրին` մաքսային վարչարարության պարզեցմանը, մասնավորապես արտահանման համար պահանջվող փաստաթղթերի կրճատմանը: «Ժամկետը հունվարի մեկն էր, սակայն կատարված չէ, եթե մեզ նման երկրները կարողացել են փաստաթղթերի թիվը կրճատել, ինչն է մեզ խանգարում»,- հարցրեց վարչապետը: Նախարարն էլ պատասխանեց, թե Մաքսային ծառայության հետ համաձայնության չեն եկել: Հաջորդ անկատար ծրագիրը լիցենզավորման եւ թույլտվությունների ընթացակարգերի եւ պահանջների պարզեցումն է: Տ. Դավթյանը լրացուցիչ ժամանակ խնդրեց, որպեսզի կարողանա պարտավորեցնել մյուս նախարարություններին: Վարչապետն էլ խորհուրդ տվեց խնդիրների դեպքում հրավիրել խորհրդի նիստ: Ըստ Տիգրան Դավթյանի` 2008-2012 թթ. նախատեսված 13 միջոցառումներից միայն երկուսի առումով վերապահումներ կան: Առաջինը նորաստեղծ ընտանիքների համար հիփոթեքային վարկավորման մատչելիության եւ հուսալիության հայեցակարգն է, որի նախնական տարբերակը ենթադրում էր լուծել նաեւ ավտոմեքենաների վարկավորման խնդիրը, որն այժմ ներառված չէ: Երկրորդը վերաբերում է ներքին աուդիտի մասին օրենքին, որն ԱԺ-ում անցել է առաջին ընթերցում, սակայն նախատեսվում է իրականացման ժամկետների հետաձգում, քանի որ նախագիծը մշակվել է Եվրամիության հետ, իսկ վերջինս այժմ 15 առաջարկ է ներկայացրել, որոնք պետք է ավելացվեն նախագծում: