Մարդու իրավունքների պաշտպան Արմեն Հարությունյանի հանձնարարությամբ Պաշտպանի աշխատակազմի աշխատակիցները երեկ այցելել են ոստիկանության Երևան քաղաքի վարչության ձերբակալված անձանց պահման վայր (ՁՊՎ)` ձերբակալված անձանց  հետ հանդիպման և վերջիններիս պահման պայմանների ուսումնասիրության նպատակով: Այս մասին տեղեկացնում է պաշտպանի գրասենյակի մամլո ծառայությունը: Այցելության ընթացքում Պաշտպանի ներկայացուցիչներն ուսումնասիրել են ՁՊՎ-ի բոլոր 21 խցերի,  կարճատև տեսակցության համար նախատեսված սենյակի, քննիչների և փաստաբանների համար նախատեսված սենյակների, բուժ. մասի և առաջին ու երկրորդ հարկերում գտնվող զուգարանների և լոգարանների պայմանները: Բացի առաջին հարկում գտնվող զուգարանի ու լոգարանի պայմաններից, որոնք  շտապ վերանորոգման կարիք ունեն, վերը թվարկվածների  պայմանները համապատասխանել են օրենսդրության պահանջներին: Այցելության պահին ՁՊՎ-ում գտնվել է միայն մեկ ձերբակալված անձ, ով Պաշտպանի ներկայացուցիչներին հայտնել է, որ հունվարի 27-ին բերման է ենթարկվել ոստիկանության Երևան քաղաքի վարչության Նոր-Նորքի բաժին, նույն օրը տեղափոխվել Ավանի բաժանմունք և այնտեղ պահվել մինչև 2009թ. փետրվարի 9-ը: Ձերբակալված անձը ՁՊՎ վարչակազմի դեմ որևէ բողոք չի ներկայացրել: Այնուհետև խմբի կողմից ուսումնասիրվել է ՁՊՎ-ում պահվող անձանց հաշվառման թիվ 14 մատյանը, որից պարզվել է, որ առկա է ՀՀ քրեական դատավարության օրենսգրքի 133 հոդվածի (ձերբակալված անձինք պահվում են ձերբակալվածներին պահելու վայրերում) պահանջի հնարավոր խախտում, քանի որ համաձայն նշված մատյանի N 6, 25, 26, 27, 28, 29, 30, 35, 36, 37, 61, 62, 72, 74, 75, 76 համարների գրառման` ձարբակալված անձինք ձերբակալվածի կարգավիճակ ստանալուց հետո ավելի քան մեկ օր պահվել են Ոստիկանության Երևան քաղաքի վարչության տարբեր բաժիններում, որից հետո միայն տեղափոխվել ձերբակալված անձանց պահելու վայր: Պաշտպանը նշված հնարավոր խախտումների պատճառ հանդիսացած հանգամանքների բացահայտման և խախտում թույլ տված անձանց պատասխանատվության հարցը լուծելու նպատակով գրություններ է նախապատրաստում համապատասխան իրավասու մարմիններին: