Երեկ ելույթ ունենալով խորհրդարանում Վրաստանի նախագահ Մ.Սահակաշվիլին երկրի կայունության պահպանման համար բոլոր քաղաքական ուժերին կոչ արեց համախմբվել: Նա միասնության կոչ արեց բոլորին` քաղաքական ուժերին եւ քաղաքացիներին: Մ.Սահակաշվիլին երկրի տնտեսական վիճակը եւ կայունությունը կապեց քաղաքական կյանքի հետ: Նա նշեց, որ «ի տարբերություն շատ հարեւանների, Վրաստանում դեռեւս չկա տնտեսական ճգնաժամ»: «Վրաստանը կարող է հայտնվել այն տասը երկրների թվում, որոնց ամենաքիչն է ազդելու համաշխարհային տնտեսական ճգնաժամը»,-ասել է Սահակաշվիլին: Իր ելույթում Սահակաշվիլին մեծ տեղ էր հատկացրել Ռուսաստանին` Վրաստանի «գլխավոր թշնամուն»: «Վրաստանի ինքնուրույնությանն ու անկախությանը դեմ դիմաց կանգնած է ուժեղ եւ վտանգավոր թշնամին, որը չի ճանաչում միջազգային իրավունքը եւ ողջ քաղաքակիրթ աշխարհի հետ խոսում է շանտաժի եւ սպառնալիքի լեզվով»,- հայտարարել է Վրաստանի նախագահը: Նա Ռուսաստանին նաեւ մեղադրել է միջազգային ահաբեկչության հետ համագործակցելու մեջ: «Այդ թշնամու նպատակը` Վրաստանի վերջնական մասնատումն է, որպեսզի Վրաստանը վերանա աշխարհի քարտեզից: Այդ իսկ պատճառով մեր խնդիրն է ավելի շատ ինտեգրվել դեմոկրատական աշխարհին, առավելագույն մոտենալ Եվորպային եւ ՆԱՏՕ-ին»,-ասել է Սահակաշվիլին: