Փետրվարի 13-ին Շիրակի մարզից տեղեկություն է ստացվել, որ Ազատան լճից նկատվում է ջրի արտահոսքի ուժեղացում, ինչի հետեւանքով հնարավոր է պատվարի փլուզում: Տեղում պարզվել է, որ եղանակի տաքացման պատճառով տեղի է ունեցել սուֆոզիա, լճի պատվարի միջնամասում առաջացել է 30 խմ ծավալով խոռոչ, եւ առկա է ջրի արտահոսք` 7-8 լ/վ արագությամբ: ՀՀ արտակարգ իրավիճակների նախարարության Հայաստանի փրկարար ծառայության տեղեկատվության եւ հասարակայնության հետ կապերի բաժինը տեղեկացնում է, որ առաջարկվել է ինժեներական տեխնիկայի միջոցով լճի ջրթողից մինչեւ Ջաջուռի հեղեղատար փորել մոտ 300 մ երկարությամբ հեղեղատար, որի միջոցով կապահովվի լճից ջրի անվտանգ հեռացումը` մոտ 60 լ/վ արագությամբ: Ազատան գյուղի ցածրադիր գոտում գտնվող տների բնակիչների հետ տարվել են բացատրական աշխատանքներ` հնարավոր արտակարգ իրավիճակի դեպքում անհրաժեշտ գործողությունների վերաբերյալ: